Një aksident tragjik ka ndodhur në orët e para të së hënës në aksin Librazhd-Prrenjas. Si pasojë e aksidentit mësohet se kanë humbur jetën drejtuesi i automjetit 55- vjeç Arjan Yze dhe gruaja e tij rreth 50-vjeçe Majlinda Yze.
Sipas informacioneve paraprake mësohet se mjeti me të cilin udhëtonin 2 viktimat ka humbur kontrollin dhe për pasojë ka dalë nga rruga duke përfunduar në përrua.
Shërbimet e Policisë dhe ato të Zjarrfikëses ndodhen në vendin e ngjarjes dhe vijojnë punën për nxjerrjen e trupave të të 2 shtetasve që ndodheshin në automjet.
NJOFTIMI I POLICISË
Librazhd/ Informacion paraprak
Rreth orës 07:45, në aksin rrugor “Librazhd-Prrenjas”, shtetasi A. Y., rreth 55 vjeç, banues në Devoll, duke drejtuar automjetin tip “Volksëagen”, ka humbur kontrollin mbi drejtimin e automjetit dhe për pasojë automjeti ka dalë nga rruga dhe ka rënë në përroin e Lengajcës.
Nga ky aksident kanë humbur jetën shtetasi A. Y. dhe bashkëshortja e tij, shtetasja M. Y., rreth 50 vjeçe, e cila ishte pasagjere në këtë automjet.
Shërbimet e Policisë dhe ato të Zjarrfikëses ndodhen në vendin e ngjarjes dhe vijojnë punën për nxjerrjen e trupave të të 2 shtetasve që ndodheshin në automjet.
Grupi hetimor vijon punën për zbardhjen e plotë të rrethanave të këtij aksidenti.
