Ministria e Mbrojtjes ka dhënë një reagim lidhur me situatën e krijuar nga moti i keq, duke njoftuar për pasojat që ka shkaktuar në disa qytete të Shqipërisë.
Për shkak të reshjeve të dendura të shiut dhe erërave të forta, disa zona të Kukësit, Elbasanit, Beratit, Vlorës, Korçës dhe Gjirokastrës janë pa energji elektrike.
Puna për riparimin e defekteve po zhvillohet në Kukës, Shkodër dhe Burrel, ndërsa ekipet e OSSH janë angazhuar në terren për rikthimin e furnizimit.
Po ashtu, janë bllokuar disa akse rrugore, përfshirë Prekal-Kir dhe Mes-Dukagjin, dhe po punohet për pastrimin e tyre për të mundësuar qarkullimin e automjeteve.
Situata po monitorohet ngushtë nga strukturat e Mbrojtjes Civile në nivel vendor dhe qendror, ndërsa AKMC është në kontakt me prefekturat dhe bashkitë për koordinimin e veprimeve në çdo rast emergjence.
