Sontë në orën 21:00 do të startojë finalja e madhe e Conference League mes Romës dhe Feyenoord. Ndërkohë ndër të parat në stadiumin “Air Albania” është akomoduar ministrja e Shtetit për Rininë dhe Fëmijët, Bora Muzhaqi. Ajo nuk ka nguruar të ndajë edhe disa foto në rrjetet sociale, duke treguar se mezi po pret që të shohë finalen mes Romës dhe Feyenoord. Muzhaqi ka deklaruar se pavarësisht rezultatit, sot Shqipëria fiton.
“Jeni gati për finalen e Conference League? Sot mu kujtua ndeshja e parë që u luajt për inaugurimin e stadiumit “Air Albania”, në nëntor të 2019-s, kur si zakonisht isha aty për të mbështetur djemtë e kombëtares. Ndonëse në atë ndeshje humbëm, sot pavarësisht rezultatit, Shqipëria fiton. Është kënaqësi e veçantë të kesh në qytetin tënd një stadium me standarde evropiane, ku tifozët sot vijnë për ndeshjen, ama nesër do të vijnë për Shqipërinë!”, shkruan Muzhaqi.
Theksojmë se kush ka hyrë brenda “Air Albania”-s i është nënshtruar një kontrolli të rreptë. Çdo person që ka biletën, e disponon atë në telefonin e tij inteligjent dhe kjo biletë është e pajisur me një “QR Code”, i cili aktivizohet në pjesën e jashtme të stadiumit dhe në pjesën e brendshme të stadiumit bëhet i vlefshëm. Çdo tifoz, me këtë biletë është i sigurt që mund të hyjë. Duke qenë elektronike, kjo biletë as nuk mund të kopjohet dhe as nuk mund të falsifikohet.
