Ajola Xoxa, bashkëshortja e kryetarit të Bashkisë Tiranë, Erion Veliaj, është paraqitur sot në ambientet e Prokurorisë së Posaçme Kundër Krimit të Organizuar dhe Korrupsionit, në zbatim të masës së sigurisë “detyrim paraqitje” të vendosur nga Gjykata e Posaçme.
Xoxa është vënë nën hetim për disa akuza të rënda, përfshirë:
Korrupsion pasiv i funksionarëve të lartë shtetërorë ose të zgjedhurve vendorë, në bashkëpunim (nëntë herë),
Pastrimi i produkteve të veprës penale ose veprimtarisë kriminale,
Mosdeklarimi, fshehja ose deklarimi i rremë i pasurive dhe interesave private, si subjekt me detyrim ligjor për deklarim.
Fillimisht ndaj saj ishte vendosur masa e sigurisë “arrest në shtëpi”, por kjo u zbut më vonë nga GJKKO në “detyrim paraqitje”.
Sipas dosjes hetimore të SPAK, Ajola Xoxa dhe Erion Veliaj dyshohet se kanë ndërtuar dhe vënë në funksion një skemë abuzimi me fondet publike të Bashkisë Tiranë, me qëllim përfitimin e paligjshëm dhe pasurimin personal. Prokuroria thekson se përfitimet janë realizuar nëpërmjet veprimeve të kamufluara dhe të kundërligjshme.
