Ajola Xoxa, bashkëshortja e kryebashkiakut të arrestuar të Tiranës, Erion Veliaj, ka paraqitur rekurs në Gjykatën e Lartë, duke kundërshtuar masën e sigurisë të caktuar ndaj saj nga Gjykata e Posaçme Kundër Korrupsionit dhe Krimit të Organizuar.
Fillimisht, ndaj Xoxës u vendos masa “arrest në shtëpi”, por kjo u ndryshua më pas në “detyrim paraqitje” pas shqyrtimit gjyqësor
. Ajo është një nga personat nën hetim në kuadër të të ashtuquajturës “dosja Veliaj”, ku dyshohet për përfshirje në një skemë abuzimi me fondet publike të Bashkisë së Tiranës.
Sipas Prokurorisë së Posaçme, Veliaj dhe Xoxa akuzohen për krijimin dhe zbatimin e një mekanizmi të organizuar për përvetësimin e fondeve publike, për qëllime përfitimi personal dhe familjar. Hetimet pretendojnë se përmes veprimeve të kamufluara dhe në shkelje të ligjit, ata kanë siguruar përfitime të parregullta ekonomike.
Ajola Xoxa përballet me disa akuza të rënda penale, përfshirë:
“Korrupsion pasiv i funksionarëve të lartë shtetërorë ose i të zgjedhurve vendorë”, kryer në bashkëpunim në nëntë raste;
“Pastrimi i produkteve të veprës penale ose veprimtarisë kriminale”;
“Mosdeklarim ose deklarim i rremë i pasurisë dhe interesave private”.
