Rama ka prezantuar sot paketën e dytë ekonomike, e cila është e vlefshme deri në fund të muajit maj.
Përfituesit e saj janë të ndarë në tre kategori kryesore:
- 40 mijë lekë të reja për 10 mijë punonjës në turizëm.
- 40 mijë lekë të reja për 66 mijë punonjës që janë larguar ose pezulluar nga biznesi i madh.
- 40 mijë lekë të reja për 100 mijë punonjës në bizneset e vogla, që kanë punuar me xhiro minimale dhe nuk përfituan nga paketa e parë.
Koordinatori për Emergjencën Arben Ahmetaj, i ftuar në “Opinion”, bëri me dije se janë 8 mijë persona në profesione të lira, që përjashtohen nga kjo paketë.
“Noterët, avokatët, mjekët, farmacistët, arkitektët, inxhinierët, agronomët, vlerësues pasurish të paluajtshme, laborantë dentarë, ekonomiste, ekspertet kontabel, laborantet, janë të përjashtuar nga kjo paketë, sepse këta praktikisht në natyrën e punës nuk janë tek qytetarët në nevojë”, tha Ahmetaj duke pohuar se paketat e qeverisë synojnë të mbështesin shtresat që janë më në nevojë.
Më tej, Ahmetaj shtoi se 176 mijë qytetarët që do të përfitojnë nga paketa e dytë ekonomike, do të paguhen brenda datës 5 maj, teksa shtoi se hyrja e paketës së dytë lindi si domosdoshmëri pas aplikimit të paketës së parë dhe si rezultat i lëvizjes ekonomike.
Sipas ministrit, deri tani nga paketa e parë janë paguar më shumë se 20 mijë persona, ndërsa ky proces do të vijojë.
“Muaji i parë verifikon punonjësit e larguar nga puna ose me aktivitet të pezulluar dhe më pas procesi vazhdon shumë më shpejt”, tha Ahmetaj duke deklaruar se pagesat e paketës së dytë do të nisin më 20 prill dhe do të përfundojnë më 5 maj.
