Agjencia Kombëtare e Mbrojtjes Civile ka lëshuar një paralajmërim të rëndësishëm për qytetarët e Shqipërisë, duke i këshilluar ata të jenë të kujdesshëm për shkak të temperaturave të larta që priten në ditët e ardhshme. Paralajmërimi vjen pas situatës së krijuar nga zjarret në pyje në rajon dhe bazuar në parashikimet e buletinit të Emergency Response Coordination Centre (ERCC) në Bruksel, si dhe të institucioneve shqiptare si IGJEO dhe Shërbimi Meteorologjik Ushtarak.
Sipas njoftimit, sot pasdite dhe nesër, niveli i rrezikut pritet të jetë “I LARTË” në qarqet e Fierit, Vlorës, Beratit dhe Gjirokastrës, ndërsa në të gjitha qarqet e tjera të vendit, niveli i rrezikut pritet të jetë “I MODERUAR”. Rreziku më i lartë do të jetë gjatë ditës së nesërme.
Autoritetet kanë bërë thirrje për kujdes të veçantë për të garantuar mbrojtjen e jetës së qytetarëve, duke marrë masat e nevojshme për sigurinë dhe përballimin e temperaturave të larta. Po ashtu, këshillohet kujdes për kafshët dhe bimësinë, dhe shmangia e pastrimit të tokës përmes djegies.
Agjencia thekson edhe rëndësinë e ruajtjes së trashëgimisë kulturore dhe mjedisit. Qytetarët janë të ftuar të ruajnë vlerat dhe monumentet kulturore nga ndikimi i temperaturave të larta dhe rreziku i zjarreve, si dhe të përdorin burime të qëndrueshme për të minimizuar ndikimin e veprimtarive njerëzore në mjedis.
Agjencia Kombëtare e Mbrojtjes Civile garanton se është në gatishmëri 24/7 për të koordinuar dhe bashkërenduar strukturat e Mbrojtjes Civile në përballjen e çdo situatë të mundshme. Qytetarët këshillohen të ndjekin udhëzimet dhe rekomandimet e autoriteteve për të minimizuar ndikimin e temperaturave të larta në jetën dhe pronën e tyre.
