Sot në orën 11:30, Gjykata e Posaçme kundër Korrupsionit dhe Krimit të Organizuar zhvillon seancën paraprake për çështjen “Partizani”.
Në fokus të seancës është vendimmarrja për kalimin ose jo të dosjes në gjykim për ish-kryeministrin Sali Berisha dhe dhëndrin e tij, Jamarbër Malltezi, të cilët janë të pandehur në këtë proces.
Gjyqtarja Floreja Davidhi do të shqyrtojë nëse do të çojë për gjykim edhe të pandehurit e tjerë në dosje: Fatmir Bektashi, Xhimi Begeja dhe Andia Pustina.
Avokatët e Berishës kanë kërkuar shtyrjen e procesit, ndërsa kanë ngritur akuza ndaj gjyqtares së hetimit paraprak, Irena Gjoka, duke u bazuar në një pretendim për një dënim të mundshëm të saj në Greqi për falsifikim dokumentesh.
Në seancën e 5 majit, mbrojtja kërkoi që të shpalleshin të pavlefshme disa prova, duke argumentuar se çdo vendim i gjyqtares Gjoka është i kontestueshëm nëse rezulton e dënuar.
Ndërkohë, më 13 maj, GJKKO rrëzoi kërkesën për përjashtimin e gjyqtares Floreja Davidhi nga shqyrtimi i kësaj çështjeje.
