Hetimet për aferën e rrugës Korçë-Ersekë kanë marrë përmasa të reja, pasi inxhinieri gjeodet Romeo Nazarko ka zbuluar se kallëzimi penal i depozituar prej tij në SPAK që në vitin 2020 kishte si objekt ministren e Infrastrukturës, Belinda Balluku, ish-drejtorin e ARRSH-së, Ergys Verdho dhe kompaninë fituese të tenderave, por jo kryebashkiakun e Kolonjës, Erion Isai.
Pak ditë më parë, SPAK mori të pandehur Isain, i cili dyshohet se ka abuzuar me tendera të shumtë me vlerë rreth 70 milionë euro. Një pjesë e tyre lidhet me projektin e rrugës Korçë-Ersekë, ku kompania “A & E Engineering” fitoi tenderët për projektimin dhe mbikëqyrjen e punimeve, në konflikt të hapur interesi.
Nazarko shpjegoi në një intervistë se kallëzimi i tij nuk përfshinte Isain, por Ballukun dhe Verdhon. “Ai kallëzim është bërë në vitin 2020, që është drejtori i ARRSH-së, ministrja e Infrastrukturës dhe pronari i firmës. Ju nuk e keni kallëzuar Erion Isain? Jo, nuk e kam kallëzuar. Por është ai që është thirrur. Janë thirrur edhe zonja Balluku e Verdho, por sot për sot kanë dalë Isai dhe 7 punonjës të Bashkisë,” tha ai.
Rruga Korçë-Ersekë, e gjatë 35 km, ka kushtuar 72,4 milionë euro pa TVSH, një kosto që u trefishua nga qeveria Rama. Aksin duhej të kishte përfunduar në qershor 2023, por afatet u shtynë dhe pak para inaugurimit një pjesë e saj u shemb, ende pa u hapur për qarkullim. Punimet u kryen nga kompania “A.N.K.” e familjes së ish-deputetit Ndue Kola.
Nazarko shpjegoi arsyet pse vendosi të kallëzojë projektin: “Jam nga fshati ku duhej të mbaronte vepra dhe si inxhinier e kuptova menjëherë se projekti nuk përputhej me terrenin. Rruga u ndryshua nga gjurma e miratuar fillimisht në vitin 2010 dhe u vendos në një aks të paqëndrueshëm, me ujëra nëntokësorë. Për pasojë, rruga dhe ura ranë. Gjithçka ishte një projekt fiktiv, i bërë në zyrë, jo në terren.”
Sipas tij, ndërtimi i gjurmës së re dëmtoi tokat bujqësore, i copëtoi pronat dhe pengoi fermerët. “Në vend që të kishte zhvillim, u krijuan probleme të reja. Kostoja u rrit pesëfish, nga 1 milion euro për km në 5 milionë. Ky ishte qëllimi i vetëm.”
Nazarko shtoi se kishte paralajmëruar edhe drejtorin e ARRSH-së për këtë aferë, duke i thënë se e dinte paraprakisht emrin e kompanisë fituese të tenderit. Ai tregoi gjithashtu se ka marrë kërcënime për kallëzimin, por pa pasoja ligjore, pasi kishte vepruar mbi bazën e fakteve.
Lidhur me përfshirjen e Erion Isait, Nazarko theksoi se ai nuk ishte objekt i kallëzimit të tij, por përfshihet në dosje pas përgjimeve dhe bashkimit të çështjeve të viteve 2004 dhe 2020. “Unë e lajmërova që po veprohej gabim, por nuk më dëgjoi,” tha ai.
Inxhinieri theksoi se gjashtë punonjës të ARRSH-së u dënuan në vitin 2021 për shkelje në këtë projekt, duke vërtetuar se ai kishte pasur të drejtë. Megjithatë, ai mbajti përgjegjësi morale, duke thënë se nëse kritikat e tij do të ishin dëgjuar në kohë, do të ishte shmangur një gabim i madh.
“Dosja u vonua pesë vite dhe rruga u bë. Dimrin që vjen do shihni çfarë problemesh do ketë me ngricat, sepse rruga nuk ka ekspozim ndaj diellit. Minimumi që duhet të bëhet është asfaltimi i gjurmës së vjetër, që njerëzit të kenë një alternativë të përdorshme,” përfundoi Nazarko.
