Rishi Sunak e ka vendosur: do të largojë nga Anglia të gjithë azilkërkuesit. Madje sot, zbuloi se ka një pistë dhe aeroplanë gati që do të largojnë emigrantët e paligjshëm në Ruanda. Por jo deri në korrik. Kryeministri britanik tha se dëbimet e para do të shtyheshin për “10 deri në 12 javë”. Në një konferencë shtypi nga “Downing Street“, ai fajësoi lordët laburistë për pengesën e krijuar, por shtoi se do të krijojë presion për të miratuar skemën e re.
“Për gati dy vjet kundërshtarët tanë kanë përdorur çdo truk për të bllokuar fluturimet dhe gomonet që ta vazhdojnë duke sjellë njerëz. Mjaft, mjaft! S’ka më përçarje, jo më vonesa. Parlamenti sonte do të ulet dhe do të votojë, sado vonë të shkojë. S’ka më “por”. Këto avionë do të përfundojnë në Ruanda,”-tha Sunak.
Dhoma e Lordëve ka bllokuar legjislacionin duke ndryshuar vazhdimisht projektligjin për emigrantët. Kryeministri tha se durimi i tij me ata që i kanë bllokuar projektligjin kishte mbaruar.
Cili është plani i Ruandës?
Sipas planit, kushdo që arrin në Britani ilegalisht do të deportohet në Ruanda, një vend në Afrikën Lindore. Qeveria beson se kërcënimi për t’u larguar në Ruandë do t’i pengojë emigrantët që të marrin rrugën dhe të kalojnë Kanalin Anglez me gomone. Pasi të jenë në Ruandë, kërkesat e tyre për azil do të përpunohen, por nuk ka rrugë kthimi për në Mbretërinë e Bashkuar, me përjashtim të disa rrethanave të jashtëzakonshme. Britania do të paguajë për emigrantët për të filluar një jetë të re në Ruandë.
Cila është pengesa?
E shpallur për herë të parë nga Boris Johnson në 2022, skema është bllokuar nga ligji. Fluturimi i parë do të nisej në verën e vitit 2022, por u bllokua në pistë në minutën e fundit nga një urdhër i Gjykatës Evropiane. Që atëherë, ligjshmëria e planit është kontestuar në gjykata, duke kulmuar me një vendim të Gjykatës së Lartë në nëntor të vitit të kaluar, i cili tha se Ruanda ishte e pasigurt për azilkërkuesit.
Çfarë po bën Sunak?
Për të shpëtuar planin e Ruandës nga vendimi i ashpër i Gjykatës së Lartë, Rishi Sunak njoftoi një zgjidhje me dy drejtime. Së pari, ai do të nënshkruante një traktat të ri me Ruandën për të forcuar mbrojtjen për azilkërkuesit. Së dyti, ai do të prezantonte legjislacion të ri që do ta shpallte Ruandën një vend të sigurt.
