Administrata Trump ka vendosur një objektiv të ri agresiv në përpjekjet për të forcuar kontrollet ndaj emigracionit, arrestimin e 3,000 personave në ditë, që përkthehet në mbi një milion në vit.
Ky objektiv, që trefishon normat e mëparshme, u paraqit gjatë një takimi të mbajtur më 21 maj në Uashington mes drejtuesve të agjencive federale të zbatimit të ligjit për imigracionin, veçanërisht ICE.
Kjo lëvizje është pjesë e një faze të re dhe më të ashpër të fushatës anti-imigracion të administratës, e cila po angazhon jo vetëm agjentët e ICE, por edhe zyrtarë të FBI-së, DEA-së, ATF-së dhe strukturave të tjera federale që tradicionalisht merren me çështje të tjera penale. Sipas raportimeve të “The Guardian”, operacionet po shtrihen gjithashtu në bashkëpunim me policinë lokale dhe sherifët nëpërmjet programit 287(g), duke u dhënë autoritet zyrtarëve lokalë të veprojnë në emër të ICE për arrestime federale.
Ajo që e bën këtë qasje edhe më të debatueshme është fakti që po arrestohen edhe individë që ndjekin rregullat e procesit ligjor, përfshirë ata që paraqiten në gjykata për çështje të imigracionit.
Në New York City, të mërkurën u raportua arrestimi i disa personave brenda dy gjykatave të ndara, përfshirë një të Manhattanit ku u ndaluan të paktën shtatë veta.
Nayna Gupta nga Këshilli Amerikan për Imigracionin kritikon këto masa si të nxitura nga një “iluzion mandati”, duke theksuar se efektet janë të thella në jetën e përditshme të emigrantëve: “Deportimi masiv po përkthehet në agjentë që shfaqen në lagje, në vende pune dhe shkolla, duke mbjellë frikë dhe dëmtuar komunitetet lokale.”
Numri i të ndaluarve nga ICE ka arritur në 49,000 persona, një rritje me mbi 10,000 që nga fillimi i mandatit të Trump, duke mbingarkuar burgjet lokale dhe ato federale.
Kjo rritje ndodh në një kohë kur kalimet e paligjshme të kufirit kanë rënë ndjeshëm pas masave të ndërmarra edhe nga administrata Biden.
Nga ana tjetër, Tricia McLaughlin, zyrtare e Departamentit të Sigurisë Kombëtare, u shpreh se këto veprime janë pjesë e zbatimit të “mandatit të dhënë nga populli amerikan për të mbrojtur vendin dhe për të dëbuar emigrantët e paligjshëm kriminelë”.
Megjithatë, edhe nëse objektivi aktual arrihet, shifrat janë ende shumë larg premtimeve të fushatës së Trump, ku ai fliste për deportimin e 15 deri në 20 milionë emigrantëve, më shumë sesa vlerësimi zyrtar për popullsinë e padokumentuar në SHBA, e cila llogaritet rreth 11 milionë.
Ndërkohë, ekspertët paralajmërojnë se përdorimi i burimeve të agjencive të tjera federale për qëllime imigracioni po pengon hetimet për çështje të tjera kritike, duke rrezikuar sigurinë dhe funksionalitetin e sistemit të drejtësisë penale në tërësi.
