Policia e Durrësit ka vënë në pranga një 60-vjeçar të shpallur në kërkim ndërkombëtar nga autoritetet italiane, i dënuar për krime të rënda seksuale ndaj një të miture.
I arrestuari është Nikolla Llogo, banues në Durrës, i cili rezulton i dënuar me 5 vjet e 10 muaj burg nga Gjykata e Apelit e Bolonjës për veprën penale “Marrëdhënie seksuale me dhunë me të mitur”, vepër e kryer në dëm të vajzës së tij, në komunën Noceto të Italisë.
Kapja e tij u bë e mundur pas operacionit policor të koduar “Operacionalja 46”, të zhvilluar nga Forca e Posaçme Operacionale në bashkëpunim me Policinë Vendore të Durrësit, pas një pune të përqendruar hetimore dhe operacionale për lokalizimin e të kërkuarve ndërkombëtarë.
Llogo ishte shpallur në kërkim nga Interpol Roma më 23 maj 2025, ndërsa autoritetet shqiptare po ndjekin procedurat për ekstradimin e tij drejt Italisë, ku do të vuajë dënimin e dhënë nga drejtësia italiane.
