Komisioni i Konkurrencës u mblodh sërish në datën 2 shtator 2021, ku dhe ka mbyllur hetimet për firmën “Trimed shpk”, në lidhje me çmimet e larta që kjo firmë ka aplikuar me materialet mjekësore të “COVID-19”, përgjatë periudhës 1 mars 2019 – 31 dhjetor 2020.
Autoriteti i Konkurrencës ka mbyllur pa asnjë ndëshkim hetimet e thelluara për tregun e materialeve mjekësore (maska, alkool, xhel dezinfektues etj.) Si në çdo rast tjetër, AK nuk ka vepruar kur shkelen hapur ligjet dhe subjekte të ndryshme, shpesh edhe në bashkëpunim me njëra-tjetrën dhe aq më tepër kur rrisin çmimet në mënyrë abuzive. Edhe në këtë rast ndodh e njëjta gjë, pavarësisht se gjatë periudhës së pandemisë, çmimet e maskave, dezinfektantëve, dorezave mbrojtëse etj, u rritën në ato nivele sa për shumë qytetarë blerja e tyre u bë e pamundur.
Autoriteti i Konkurrencës, pas mbylljes së hetimeve, doli në përfundimin se përgjithësisht ndërmarrjet që veprojnë në këto tregje, i kanë zbatuar masat e përkohshme, që AK mori pasi u gjobitën njëherë për moszbatimin e tyre vjeshtën e kaluar.
Sjellim në vëmendje se hetimet paraprake kanë nisur në datën 18.03.2020, pas denoncimeve të shumta nga qytetarët se firma “Trimed” e cila është në pronësi të Vilma Nushit ka tregtuar maska, alkoole, xhel dezinfektues, termometra etj, me çmime të larta, duke krijuar skemë çmimesh monopol shumice e pakice në treg. Nga hetimi ka rezultuar se këto çmime abuzive me materialet “Covid 19”, firma “Trimed shpk”, nuk i publikonte në faqen zyrtare, ndërsa në bilance vepronte me 4 tabela të ndryshme çmimesh.
Neni 74, pika ‘1’, gërma ‘b’ e Ligjit nr. 9121/2003, përcakton gjobë sa 10% e xhiros vjetore; për shkelje të rënda të konkurrencës në treg nëpërmjet falsifikimit e çmimeve monopol, si kjo e bërë nga firma “Trimed shpk” e Vilma Nushit me materialet mjekësore “Covid-19”;
Sipas xhiros vjetore, firma “Trimed shpk”, duhej gjobitur me 245 milionë lekë, mirëpo Komisioni, me Vendim nr. 717, datë 15.10.2020 e ka gjobitur 1 milionë lekë; gjobë; e cila nuk është paguar, me arsyetimin se Vilma Nushi ka pranuar të hetohet dhe ka lejuar inspektorët datat 24.8.2020 e 19.10.2020, të kontrollonin dokumentet. Edhe pse u konstatuan abuzime të rënda me çmimet, komisioni i Konkurrencës, me Vendim Nr. 830, datë 02.09.2021, ka vendosur që të mos gjobis firmën “Trimed shpk” dhe ka lajmëruar se do të jetë edhe një vit në monitorim.
