Ditën e djeshme Gjykata e Posaçme shpalli fajtor Fatos Tushen, i arrestuar në qershor të vitit 2021 për shpërdorim dhe shkelje te barazisë në tendera.
Nga 3.4 vjet burgim qe kërkoi SPAK gjykata vendosi tre vite e gjashtë muaj burg, por me gjykim të shkurtuar dënimi shkon në dy vite e katër muaj burg.
GJKKO shpalli edhe vendimin për bashkëpunëtorët e tij, punonjës, juristë, drejtorë te ndërmarrjes së pasurive publike të këtij qyteti të përfshirë në shkelje. Për Flamur Peqinin Prokuroria e Posaçme kërkoi tre vite dhe katër muaj burg, ndërsa Gjykata e Posaçme e ka dënuar me dy vite burg. Fajtor është shpallur edhe ish-zv.kryetari i Bashkisë së Lushnjës, Gentian Nushi, i cili u dënua nga Gjykata me një vit e tetë muaj burg.
Po ashtu, ish-drejtori i Prokurimeve Publike. Leonard Sefa është dënuar me një vit e gjashtë muaj burg. Juristja Blerta Turku u dënua nga GJKKO me 1 vit e katë muaj burg, ndërsa Bardh Mëhilli mori një vit e gjashtë muaj burg. Gazment Çela u dënua me një vit e tetë muaj burg, Xhemal Hasko dhe Andi Nushko me nga një vit e katër muaj burg secili, ndërsa zyrtarja Margarita Gjermeni mori një vit e tre muaj burg.
Bektash Nezha dhe Iva Billo u dënuan nga GKKO me një vit burg, por që praktikisht janë të lirë pasi e kanë kryer dënimin.
Si u zbulua abuzimi me tenderin prej 24 mln lekësh
Hetimet e SPAK zbuluan abuzime me tenderin prej 24 milionë lekësh për rehabilitimin e një kanali vaditës në Bishqem të Lushnjës dhe pas hetimeve dyshohet se ish-kryebashkiaku i Lushnjës ka kryer shkelje për dhënien e tenderit në favor të miqve të tij.
Ai u gjykua së bashku me 19 të pandehur të tjerë, punonjës, juristë, drejtorë te ndërmarrjes së pasurive publike të këtij qyteti të përfshirë në shkelje. Tushe ka hedhur poshtë të gjitha akuzat e SPAK duke thënë se nuk ka bërë shkelje në tendera dhe se ishte detyra e tij të kujdesej për banorët e zonës dhe në këtë mënyrë ka kërkuar pafajësinë. Sipas avokatit të Tushes, i mbrojturi nga ai nuk kishte asnjë kompetencë apo funksion në lidhje me procedurat e prokurimit që të nënshkruajë akte të tilla dhe sipas tij vlerësimet mbi të nuk janë objektive dhe akuzat nuk mbrohen me fakte konkrete.
Për Flamur Peqinin prokuroria e posaçme kërkoi 3.4 vite burg, Ibrahim Lamin 1.6 vite, Gazmend Çelën 1.8 vite, Gentian Nushin 2.8 vite, Leonard Sefën 1.8 vite, Blerta Turkun 1.8 vite, Xhemal Haskon 1.8, Andri Musho 1.4 vite, Margarita Gjermeni 1.8 vite, Bektash Nexha 1.4 vite, Ani Simoni 1.4 vite. Në vendimin e dhënë ndaj tyre, të pandehurit përfitojnë gjykimi të shkurtuar sipas SPAK dënimi duhet të zbresë në shërbim prove për tre vite.
