Talo Çela është një nga “kokat” e krimit në vend, arrestimi i të cilit është kthyer në një sfidë për forcat policore në vend.
Ditën e sotme, në një deklaratë për shtyp krerët e Prokurorisë dhe Policisë së Elbasanit kanë zbardhur detaje nga operacioni i djeshëm i SPAK në zonë. Gazetarët e kanë pyetur Drejtorin e Policisë Elbasan, Ardian Çipa për emrin e killerit Talo Çela, nëse ky i fundit ka qenë subjekt i operacionit të djeshëm dhe a është dekonspiruar operacioni për kapjen e tij.
“Hetimet për çdo person të kërkuar dhe personin që përmendët janë intensive dhe në të ardhmen do të ketë rezultate pozitive”, u përgjigj ai.
Kujtojmë që Talo Çela është person i shpallur në kërkim kombëtar dhe ndërkombëtar, pasi Gjykata për Krimet e Renda Tiranë i ka caktuar masën e sigurisë “Arrest në burg”, për veprat penale “Vrasja e punonjësit të policisë” kryer në bashkëpunim, mbetur në tentativë, “Vjedhja me armë e kryer në bashkëpunim”, në kuadër të grupit të strukturuar kriminal dhe “Vrasja me paramendim, kryer në bashkëpunim”.
Çela është autori i dyshuar i ngjarjes së datës 9 prill 2019, ndodhur në pistën e aeroportit “Nënë Tereza”, në Rinas, Tiranë, ku persona të maskuar, nën kërcënimin e armëve të zjarrit, kanë arritur të vjedhin një sasi të konsiderueshme vlerash monetare të cilat po ngarkoheshin në avion dhe më pas gjatë shkëmbimit të zjarrit me Policinë, mbeti i vrarë njëri prej autorëve kryesorë të kësaj ngjarjeje.
Policia e Elbasanit ka futur në ngërç procesin gjyqësor ndaj të shumëkërkuarit Talo Çela. Prej më shumë se një muaj Gjykata e Posaçme i ka kërkuar bluve të Elbasanit, që në banesën e 51-vjeçarit, të ngjisë njoftimin se ndaj tij ka nisur një proces gjyqësorë, por ky veprim procedurial nuk është kryer ende nga policia.
