“Nisma Thurje” ka reaguar nëpërmjet një postimi në rrjetin social “Facebook” se në orën 13:00 të ditës së sotme ka dorëzuar në SPAK kallëzimin penal për inceneratorin e Fierit.
Sipas kallëzimit, Nisma Thurje pretendon se i gjithë grupi i inceneratorëve në Shqipëri kanë lidhje me Klodian Zoton dhe Mirel Mërtitin, të cilët lidhen me kompani të regjistruar jashtë vendit.
Kujtojmë këtu se Klodian Mërtiri njihet edhe si Mirel Mërtiri dhe si Ilir Dedja (biznesmeni i inceneratorëve) është shpallur në kërkim ndërkombëtar nga Zimbabve për korrupsion, për një tender të pajisjeve mjekësore për Covid-19, me vlerë 60 milionë dollarë.
Në të gjitha mediat vendase e të huaja thuhet se bëhet fjalë për të njëjtin person, i cili ka përdorur tre identitete, por vetë Mirel Mërtiri i ka mohuar lajmet.
Kujtojmë se administratori i kompanisë së Mërtirit, Delish Nguvwaya (ky një biznesmen nga Zimbabve), ka qenë më parë i dënuar për pastrim parash dhe ka rënë së fundmi në pranga.
Nguwaya ka një të kaluar kriminale, përfshirë arrestime të shumta për grabitje me armë dhe posedim kokaine.
Pak ditë më parë qeveria e Zimbabves urdhëroi anulimin e tenderit 60 milionë USD që agjencia shtetërore shëndetësore, “Natpharm” kishte lidhur me kompaninë “Drax International” të biznesmenit shqiptar, Ilir Dedja, nën dyshime për aferë korruptive.
Po ashtu, Nisma Thurje, akuzon qeverinë se është kompromentuar në falsifikimin e dokumenteve të pronësisë ku do ndërtohet inceneratori i Fierit.
Në kallëzimin e dorëzuar ditën e sotme, evidentohen edhe disa shkelje, si prishja e garës për tenderin, keqpërdorimi i parasë publike nga 15 milionë euro e kostos së ndërtimit tek 28 milionë që është tenderuar.
Postimi i plotë i Nismës Thurja:
Sot në orën 13:00 do të dorëzojmë në SPAK kallëzim penal për aferën e incineratorëve.
Të njëjtët personazhe, aksionerë në kompanitë konçesionare që përfitojnë miliona euro në vit nga buxheti i shtetit pa dhënë asnjë shërbim, në Zimbabve shkaktuan një skandal që çoi në burg Ministrin e Shëndetësisë dhe një biznesmen.
Ilir Dedja, një nga aksionerët e konçesionarit të incinerimit në Shqipëri, është shpallur në kërkim ndërkombëtar teksa ne vazhdojmë ta paguajmë çdo muaj.
Pyetja që do shtrojmë sot është:
A mund të kemi drejtësi të paktën sa në Zimbabve?
https://www.facebook.com/thurje/posts/1312909792251519
