Protesta e opozitës e vendosur në 16 shkurt duket se nuk është duke përcjellë “shqetësimin” që pretendon tek pala tjetër, mazhoranca.
Ditën e sotme, deputetja e PS-së, Klotilda Ferhati, e ftuar në News24 ka dhënë mendimin e saj rreth pyetjes nëse mazhoranca “ka frikë” nga protesta që pritet nga opozita, por mesa duket përgjigjja ka qenë krejt e pritshme. Deputetja ka thënë se do të ishin qytetarët që do të çoheshin atëherë situata do të ishte ndryshe, por duke qenë se ajo po organizohet nga opozita, s’kanë pse të kenë frikë, pasi janë vet ata që do të mbajnë përgjegjësi nëse ndodh edhe cenimi më i vogël i rendit.
Sipas Ferhatit, opozita nuk duhet të synojë marrjen e pushtetit me dhunë, por të punojë fort dhe ta marrë atë me votë.
“E drejta e çdo kujt është e drejtë legjitime në demokraci. PD njihet si partia e protestave. Është një parti që ka votat e veta dhe çështja është se masiviteti i një proteste që bëhet duke u organizuar një muaj e gjysmë më përpara sikur do ketë fushatë. Pra nuk është një protestë e qytetarëve, por e opozitës se qytetarët ngrihen aty për aty dhe nuk kanë pse organizohen para 2 muajsh. Protestat e qytetarëve janë spontane. Protesta organizohet nga opozita dhe është opozita ajo që do mbajë përgjegjësi nëse shkelet rendi dhe siguria. Ka ikur koha kur pushteti mund të rrëzohet me dhunë. Pushteti merret me votë dhe jo me protesta e dhunë”- tha Ferhati.
Deputetja i ka kushtuar kohë edhe ngjarjeve të fundit të Kuvend, për të cilat thotë se të gjitha bien ndesh me kodin e etikës dhe sigurisht në gjuhë e papranueshme për seanca të një rëndësie të tillë.
“Shumë deputetë nuk merren me rendin e ditës dhe komunikimi ne kuvend është për të ardhur keq. Opozita përdori foltoren për thirrjen e protestës dhe gjuha ne parlament bie ndesh me kodin e etikes. Sjelljet e pahijshme vijnë kur mungojnë argumentet. Kolegët e opozitës janë ata që merren me çështje që nuk kanë të bëjnë me rendin e ditës. Nuk po them që një palë janë të mirët dhe një palë të këqijtë. Gratë deputete janë më të kujdesshme në ruajtjen e etikës”- tha deputetja.
