Ambasadorja Amerikane, Yuri Kim ka folur në lidhje me zgjedhjet e 25 prillit në emisionin “Përballë” të gazetarit Lutfi Dervishi. E pyetur nëse SHBA-të kanë një kandidat të preferuar, Kim është përgjigjur me “jo”. Ambasadorja tha se ajo për të cilën shqetësohen SHBA-të, janëinstitucionet dhe proceset. Sipas saj e rendësishme është që proceset të jenë të rregullta dhe transparente.
“Mendoj se është mënyra e gabuar e të menduarit. Mendoj se nuk është ky roli ynë. Nëse po pyesni, a e vrasim mendjen për çfarë ndodh? Po, e vrasim mendjen. A kemi një kandidat të preferuar? Jo, nuk kemi. Nuk është ky pozicioni i Shteteve të Bashkuara. Ajo për të cilën vrasim mendjen janë institucionet dhe proceset. Dhe, prandaj nuk flas për këtë kandidat apo atë kandidat, këtë apo atë parti, por flas për rëndësinë, rëndësinë kritike që ka që të sigurohemi që rregullat dhe proceset janë të ndershme, janë transparente, që fusha e lojës është e njëjtë për të gjithë, dhe që rregullat të zbatohen edhe në kohë, që të gjithë të kenë të njëjtat shanse. Kjo është ajo për të cilën kemi interes”, tha Kim.
Më tej ajo u ndal edhe tek vota duke thënë se është baza e çdo demokracie. Kim tha se vota është pushteti i njerëzve dhe ky është momenti për të treguar se janë të lodhur nga korrupsioni dhe pandëshkueshmëria.
“Votuesit shqiptarë janë shpresa e parë më e mirë. Kjo është baza e çdo demokracie, votuesit. Ndaj mendoj që njerëzit i kanë bombarduar të besojnë se nuk kanë pushtet. Fakti që dikush përpiqet të blejë votën tënde duhet të tregojë se nuk jeni pa pushtet.
Ky është pushteti juaj. Vota jote është pushteti yt. Shqiptarët që takoj kudo në vend më thonë se iu ka ardhur në majë të hundës nga korrupsioni; iu ka ardhur në majë të hundës nga pandëshkueshmëria; iu ka ardhur në majë të hundës nga kriminelët që ulen në parlament. Epo, ky është momenti. Ma tregoni me veprime, tregojeni me veprimet tuaja se e keni seriozisht”, tha ambasadorja
