Sot bëhen dy vite nga tërmeti tragjik i 26 nëntorit, ku humbën jetën 51 persona. Veç jetëve të humbura, shumë njerëz mbetën të pastrehë pasi qindra ndërtesa që ishin shtëpi për shumë familje u shkatërruan.
Edhe pas dy vitesh shumë familje janë ende në rrugë, ndërsa procesi i rindërtimit ende nuk është mbyllur. Bashkitë kanë kërkuar një tjetër fond për rindërtimin dhe pritet t’u shpërndahen 6 miliard lekë grante të tjera rikostruksioni. Afatet për përfundimin e procesit të rindërtimit janë shtyrë herë pas here dhe viti 2023 është menduar se do të jetë viti kur do të kenë përfunduar edhe pallatet e planifikuara për t’u rindërtuar. Arsyetim për shtyrjen e afateve u bë pandemia, por nuk dihet ende se çfarë është bërë me grantet që u caktuan fillimisht për rindërtim, përderisa bashkitë kërkojnë të tjera fonde.
Në Durrës disa banorë kanë dalë sot në protestë dhe kanë thënë se deri tani kanë parë vetëm foto të projektit të pallatit, por puna nuk ka nisur. Ata trajtohen ende me bonus qiraje dhe nuk e dinë se kur do të mund të hyjnë në apartamentet e tyre.
Shumë familje të tjera do kalojnë dimrin e tretë në çadra, teksa qeveria nuk ka dhënë asnjë shifër zyrtare se saj personave iu është dhënë një shtëpi deri tani.
Mirëpo, tërmeti i 26 nëntorit vuri në dukje edhe një problem tjetër. Trupat shqiptare të shpëtimit punonin me mjete të kufizuara për të nxjerrë banorët nga rrënojat. Ishin shtetet fqinje dhe më tej që ofruan ndihmën e tyre me pajisje të specializuara, qen nuhatës dhe furnizime të tjera emergjencash për të vijuar operacionet e shpëtimit.
Edhe sot, pas dy vitesh, qeveria nuk duket të ketë reflektuar në ndryshimet që duhen bërë për t’u paraprirë fatkeqësive në të ardhmen. Dy vite kanë qenë të mjaftueshme për të bërë investimet e nevojshme në ekipet e emergjencave, pajisjet e nevojshme, repartin e zjarrfikëse etj.
Po ashtu qeveria nuk ka bërë deri tani një rivlerësim të mënyrës si janë ngritur shumë ndërtesa dhe a janë rezistente në raste të tjera tërmeti.
Veçse duhet të kishte mbyllur procesin e rindërtimit, qeveria duhej edhe të ishte siguruar që të parandalonte dëmet katastrofike për të ardhmen e të investonte në strukturat dhe mjetet që në raste të tilla shpëtojnë jetë.
