Vrasja e komandantit të Forcës Revolucionare të Iranit (QUDS), Qasem Soleimani nga SHBA-të, mund të ketë pasoja në rang global.
Tashmë Irani dhe SHBA-të mund të përfshihen në një konfrontim të drejtpërdrejtë ushtarak.
Philip Gordon, ish-koordinatori për Lindjen e Mesme gjatë presidencës së Obamës, e ka konsideruar vrasjen një sinjal për luftë të Amerikës për Iranin.
Prej 4 vitesh, trupat e drejtuar nga Soleimani, kanë zhvilluar operacione në Liban, Irak dhe Siri, për të përhapur influencën e Iranit.
Për sulmin ndaj bazës amerikane në Irak dhe ambasadës së SHBA në Baghdad, Pentagoni ka fajësuar trupat iraniane, duke u hakmarrë më pas me vrasjen e Soleimanit.
Sipas Pentagonit, Soleimani kishte planifikuar sulme ndaj diplomatëve amerikanë dhe stafit të shërbimit diplomatik në Iraq dhe zonat përreth.
Ajo që do të ndodhë në të ardhmen është një pikëpyetje e madhe.
Megjithatë nuk pritet ndonjë përgjigje e fuqishme nga ana e Iranit.
Sipas analistëve, në shënjestër mund të jenë 5000 trupat amerikane në Irak.
Gjithashtu vrasja e Soleimanit, pritet të shkaktojë luhatje të mëdha në çmimin e naftës.
Aleatët e SHBA në rajon ndërkohë kanë nisur të pëforcojnë mbrojtjet e tyre.
Gjithashtu Washingtoni ka rritur numrin e ushtarëve në ambasadën në Baghdad.
Përgjigja e Iranit pritet të vijë në rrugë të tjera, ku do të shfrytëzohet influenca e krijuar nga Soleimani në zonat përreth.
Sulmi ndaj kreut të forcave QUDS konsiderohet si një demostrim force nga ana e SHBA-ve, pas kërcënimeve të vazhdueshme të Iranit.
Mirëpo për analistët, kjo nuk është gjëja më e zgjuar që presidenti Donald Trump mund të bënte.
Qasem Soleimani ishte figura më e fuqishme në Iran, pas liderit Ayatollah Khameini.
Soleimani ishte koka e aktivitetit të regjimit Iranian në Lindjen e Mesme.
Ai gjithashtu konsiderohet se arkitekti i ofensivës së regjimit të Bashar al-Assad ndaj rebelëve në Siri.
Njëkohësisht Soleimani kishte ngritur grupe paramilitare në Irak, për të luftuar ndaj ISIS.
Pas ofensivës së SHBA në Irak në vitin 2003, Soleimani filloi të ngrinte grupe ushtarake dhe është përgjegjës për një sërë sulmesh ndaj bazave amerikane, duke vrarë qindra ushtarë.
Tensionet mes Iranit dhe SHBA-ve, filluan pasi presidenti Trump, doli nga marrëveshja nukleare për Iranin.
SHBA-të i kanë bërë thirrje të vazhdueshme Iranit, që të ndërpresë programin bërthamor, por thirrjet janë refuzuar.
