Dita e djeshme ishte e mirë për dhëndrin e Sali Berishës, Jamarbër Malltezin, i cili u lirua nga burgu dhe mori masën arrest shtëpie për çështjen e ish-kompleksit Partizani, për të cilën akuzohej se ishte përfshirë në korrupsion. Lidhur me këtë ditën e djeshme ka qenë i ftuar Sali Berisha në News 24, ku u pyet nëse e kishte takuar Malltezin pas lirimit nga burgu.
Ai u shpreh se nuk e ka takuar dhe nuk kishte se çfarë të fliste me të, pasi ka qëndruar në komunikim të vazhdueshëm edhe kur ai ka qenë në qeli.
Berisha e quajti edhe njëherë këtë ngjarje një betejë politike dhe se dhëndri i tij ishte një i burgosur politik në qeverinë Rama. Madje Berisha tha se Malltezi e tmerroi ligjërisht Edi Ramën.
“Ai ka qenë me moral të lartë si një i burgosur politik. Malltezi ka bërë edhe shkrime, ka reaguar. Ka qenë shumë aktiv. Në betejën politike nuk ka keqardhje, ka betejë. Ai tregoi opozitarizëm. Ishte në betejën politike. Nuk kishte çfarë të ndaja pasi isha në komunikim konstant. Ishte një i burgosur politik. Ai e tmerroi Edi Ramën”, tha ndër të tjera ish-kryeministri i vendit.
