Ish-kryeministri Sali Berisha ka trazuar ujërat me një deklaratë që lë të kuptohet se ai mund të rikthehet në krye të PD. Pasi votoi në zgjedhjet për kreun e ri demokrat, Berisha foli për gazetarët, duke bërë fillimisht thirrje për pjesëmarrje në votime.
“Të marrin pjesë sa më shumë në këtë proces votimi. Mesazhi i ditës së sotme është pjesëmarrja në votim. Unë besoj se pasi kam shprehur qëndrimin tim, kjo nuk do ta nxjerrë të ndarë, por përkundrazi do ta nxjerrë të bashkuar. Kandidatët kanë shprehur pikëpamjet e tyre dhe janë zotuar që do të vazhdojnë pavarësisht nga rezultati përpjekjet e tyre për PD-në dhe vendin”, tha Berisha.
I pyetur nga një gazetare nëse mund të rikthehet në drejtimin e PD në të ardhmën, Berisha tha se nuk e përjashton të drejtën e tij kushtetuese.
Pjesë nga intervista:
Pyetje: Keni thënë që Sali Berisha kurrë nuk do të kthehet në funksionet e PD?
Berisha: Kurrë mos thuaj kurrë, Never say never
Pyetje: Këtë shprehjeje e keni përdorur me Ramiz Alinë?
Berisha: E kam përdorur atëherë dhe sot e përdor prapë. Unë po ecja në një drejtim, kam ndërruar dhe i kam hequr pengesat e mia
Pyetje: Nuk përjashtoni edhe drejtimin e PD në të ardhmen?
Berisha: Nuk përjashtoj asnjë të drejtë time kushtetuese më. Kategorikisht
