Kreu i Komisionit Qendror të Zgjedhjeve, Ilirjan Celibashi ka thënë se ndaj komisionerëve që tjetërsuan votën në zgjedhjet e 25 prillit mund të ketë edhe kallëzime penale. Duke folur për mediat nga Korça, Celibashi tha se në përfundim të procesit të vlerësimit për atë që ka ndodhur, natyrisht që do të ketë edhe sanksione.
“Jemi në proces vlerësimi akoma të asaj se çfarë ka ndodhur gjatë proçesit të numërimit të fletëve të votimit, në përfundim të këtij procesi në rastet kur do të identifikohen qartazi shkelje të rënda të rregullave të procesit për numërimin e fletëve të votimit normalisht që do të ketë sanksione të karakterit administrativ por edhe kallzime penale kur këto shkelje tregojnë dukshëm deformimin e rezultatit të numërimit”, ka thënë Celibashi.
I pyetur nëse Shqipëria ka nevojë për një reform të re zgjedhore pas çdo procesi të zgjedhjeve, nisur edhe nga kërkesa e fundit e PD, Celibashi u shpreh se këtë herë është e nevojshme, pasi edhe ODIHR i sugjeron ndryshimet në kodin zgjedhor.
“Këtë herë ka nevojë për të kryer një reformë zgjedhore sepse edhe ODIHR sugjeron ndryshine në kodin zgjedhor, por është e rëndësishme që kjo gjë të fillojë tani dhe është gjë e mirë që opozita e ka ndërmarrë këtë inisiativë pozitive dhe që shumica qeverisëse e ka mbështetur dhe kjo është pozitive. Shpresojmë që proçesi të finalizohet sa më shpejt dhe të mos jemi në pozitën e herëve të tjera kur reformat zgjedhore kanë përfunduar 4,5,6 apo qoftë edhe 1 vit para zgjedhjeve”, tha Celibashi.
