Ish-kryeministri Sali Berisha ka konfirmuar se do të jetë në parlament këtë të premte, duke mos hequr dorë nga mandati i deputetit. I ftuar në Euronews, në emisionin “Now”, Berisha tha se nuk fshihet pas mandatit dhe se në asnjë lloj rrethane nuk mund ta shkelmojë sovranitetin e vendit që është shprehur me votën e qytetarëve.
Më tej ai garantoi se do të ketë opozitarizëm përballë Edi Ramës, pasi ky i fundit ka treguar ligësinë për të eliminuar kundërshtarët me shpifje e mashtrime.
“Unë nuk fshihem prapa mandatit. Sovraniteti i vendit është shprehur me votën e qytetarëve.
Aty do të kem përpara Edi Ramën dhe e garantoj se do të ketë një opozitarizëm, që atij do ti duken lule ato që kanë qenë përpara, sepse ai ka treguar me këtë mënyrë përfundimtare ligësinë e pafundme shpirtërore për të eliminuar kundërshtarët me shpifje dhe mashtrime. Këtë s’e ka bërë njeri, kurrë”, ka thënë Berisha.
Lidhur me qëndrimin e PD-së për shpalljen e tij “non-grata”, Berisha tha se është mbajtur qëndrimi i duhur dhe ka kërkuar transparencë.
“Mendoj se PD ka mbajtur qëndrimin që duhej të mbahej, ka kërkuar transparencë, që PD të konsolidojë apo të marrë qëndrim ndaj një personi, apo Sali Berishës, PD duhet të ketë fakte, dokumente dhe prova, jashtë tyre, PD qëndrim tjetër nuk mund të mbajë”, tha ish-kryeministri.
