Kryeministri Edi Rama është prononcuar për mediat pasi është mbyllur mbledhja mes tij dhe drejtuesve të qarqeve në selinë socialiste. I pyetur nëse do të dëshmojë në komisionin hetimor për zgjedhjet e 25 prillit, Rama ka thënë se nuk ka asnjë problem, por ende nuk e ka marrë një ftesë. Ai shtoi se çdo ditë po bëhet edhe më e qartë se Partia Demokratike i humbi zgjedhjet.
“Nuk kam asnjë problem, unë nuk jam ftuar akoma, nuk kam marrë asnjë ftesë. S’kam asnjë problem, për të gjitha gjërat që do të më kërkohet, s’kam asgjë, do të shkoj. Është një komision i ngritur me kërkesën e Opozitës, e dimë shumë mirë se si kanë rrjedhur ngjarjet. Qytetarët kanë qenë votues të lirë. Përditë e më e qartë po bëhet se Partia Demokratike ka humbur zgjedhjet”, tha Rama.
Ai u pyet edhe për vettingun e politikanëve dhe tha se kërkesa e parë është bërë në vtin 2018 dhe vuri në dukje se nëse ka argumenta bindëse, është i gatshëm për t’u ulur në tryezë dhe do të japë gjithë disponimin për të dëgjuar.
“E para njëherë kërkesa e parë është bërë në vitin 2018. Tani kanë kaluar tre vite dhe gjërat ndryshojnë, nëse ka argumenta bindëse, do të ulemi në tryezë, do të japim të gjithë disponimin për të dëgjuar, do të marrim mendimin e ekspertëve të fushës dhe do dalim në konkluzione”, ka thënë Rama.
