Ministrja e Shëndetësisë Ogerta Manastirliu në një lidhje me Skype për emisionin “Opinion” foli më shumë rreth fazës aktuale në të cilën ndodhet vendi ynë, teksa tha se kurba është e sheshtë dhe vendi i është shmangur pikut.
Sipas Manastirliut në ditë mesatarja e rasteve të reja shkon në 18.5, teksa shtoi se masat e marra refklektojnë situatën dhe nëse masat nuk do ishin marrë ne do të ishim përballur me një fluks më të madh.
Ndërkohë, e pyetur rreth rihapjes së shkollave ministrja tha se ende po punojnë për këtë çështje, por nuk ka ende një datë fikse.
“Jemi duke bërë një vlerësim, por ende nuk kemi një datë të përcaktuar, por ne duhet të bëjmë një vlerësim, i cili bazohet në disa kritere që Komiteti Teknik i Ekspertëve ka përcaktuar. Ata lidhen me një monitorim dyjavor pas lehtësim i të masave të para, vlerësim i kurbës për dy javë, bëhet vlerësimi i kapaciteteve të spitaleve, vlerësohet se si po e ndjek sistemi monitorimin e infeksionit aktiv në terren dhe më pas jepen sugjerime se di mund të kalohet nga njëra faze tek tjetra.”
Kujtojmë se me indentifikimin e rasteve të para me koronavirus në Shqipëri, qeveria vendosi mbylljen e shkollave për dy javë deri më 23 mars, e me shtimin e rasteve afati u shty deri më 3 prill.
Por, duke marrë shkas nga zhvillimet në vend Ministria e Shëndetësisë ka vendosur më 1 prill mbylljen e të gjithë institucioneve publike dhe private deri në një kohë të pacaktuar.
