Edhe pse u tha se vendimi për djegien e mandateve të paktën nga ana e Partisë Demokratike është thënë se është unanim, duket se jo të gjithë deputetët kanë ndarë të njëjtin mendim. Pas Myslim Murrizit edhe një tjetër deputete nuk e ka dorëzuar mandatin e saj dhe bëhet fjale për Rudina Hajdarin.
Megjithatë e ftuar ditën e sotme në “Top Talk”, deputetja e PD-së, Grida Duma është pyetur nëse edhe për Hajdarin dot merret e njëjta masë si me Murrizin, mirëpo nuk morëm një përgjigje të plotë.
“Nuk bëhet me mua ky diskutim. Marrja e vendimit për këdo është bërë në Kryesinë e PD-së, ku kolegët kanë marrë fjalën dhe kanë thënë mendimin e tyre individualisht. Unë besoj që ishte respektim statutor i statutit të ri (në rastin e Murrizit), ku është përfshirë edhe termi përjashtim. Nuk dua të shprehem personalisht për këtë vendim sepse është vendim nga forumet e partisë”, ka thënë Duma.
Deputetja Hajdari në momentin që është dhënë dorëheqja e shumicës së opozitës nuk ka qenë e pranishme, pasi ndodhej jashtë shtetit, por ndonëse është kthyer që të premten, ajo nuk ka qartësuar qëndrimin e saj. Megjithatë, nëpërmjet një reagimi të gjatë në llogarinë e saj në Facebook, Rudina Hajdari ka njoftuar se nuk është shprehur deri tani për shkak të problemeve shëndetësore dhe se shumë shpejt do të dalë me një qëndrim publik.
