Ministri i Brendshëm shqiptar, Taulant Balla në një intervistë të dhënë për DW ka treguar më shumë detaje lidhur me marrëveshjen Rama-Meloni për strehimin e emigrantëve në vendin tonë.
Ashtu sikurse u shpreh dhe kryeministri më parë, Balla ripërsëriti të njëjtat argumenta lidhur me menaxhimin e kësaj situate.
Balla tha se Italia do të përdorë pa shpërblim zonat shqiptare ku do vendosen refugjatët. Madje, theksoi se qeveria shqiptare nuk do harxhojë lekë për transferimin e tyre nga Italia drejt Shqipërisë.
“Palës italiane i jepet vetëm e drejta e përdorimit të zonave të përcaktuara pa kundër-shpërblim. Zonat do të menaxhohen tërësisht nga pala italiane, sipas juridiksionit të shtetit italian, që do të jetë përgjegjës për zgjidhjen e mosmarrëveshjeve që mund të lindin brenda këtyre zonave”, tha ai.
Pyetjes se sa do të qëndrojnë në vendin tonë emigrantët, Balla iu përgjigj në një mënyrë shumë diplomatike, duke mos dashur të japë një afat të caktuar, por argumentoi se do të qëndrojnë aq sa ka përcaktuar legjislacioni Italian.
“Afati maksimal i qëndrimit të tyre do të jetë në përputhje me afatin e përcaktuar në legjislacionin italian për këto procedura”, theksoi ministri.
Ndërsa, lidhur me sigurinë publike Balla u shpreh se emigrantët nuk do të lëvizin jashtë perimetrit të caktuar nga qeveria.
“Siguria brenda zonave të përcaktuara në marrëveshje do të garantohet nga pala italiane, që ka detyrimin për të ruajtur rendin dhe sigurinë publike në perimetrin e brendshëm. Pala shqiptare ka rezervuar të drejtën për të pasur akses në zona vetëm në rast rreziku potencial, që do të kërkojë ndërhyrje të menjëhershme. Migrantët nuk do të lejohen të dalin jashtë zonave të caktuara gjatë gjithë kohëzgjatjes së qëndrimit në territorin shqiptar”, sqaron Balla.
Burimi: Deutsche Welle
