Zv.kryeministrja Belinda Balluku ka shprehur konsideratat për kreun aktual të Bashkisë së Tiranës, duke deklaruar se asnjëherë nuk mendon ta zevëndësojë. Në kontekstin e politikës sigurisht Ballukun dhe Veliajn e lidhin aferat korruptive, teksa zhvaten qytetarët, por marrëdhënia e tyre duket se është edhe familjare.
Ajo shprehet se ato e konsiderojnë njëri tjetrin vëlla dhe motër dhe gjithashtu Veliaj është nuni i vajzës së saj.
“Unë Erionin nuk e njoh nga jeta politike, unë me Erionin njihem shumë më parë, kur edhe unë edhe ai nuk kishim lidhje me politikën. Siç më konsideron mua motër, edhe unë e konsideroj vëlla. Erioni është nuni i vajzës time, e kemi mbështetur njëri-tjetrin gjithmonë. Ne kemi një parim që në PS kontribuojmë aty ku i duhemi partisë. Nëse partia mendon se duhet të kontribuoj në bashkinë e Dibrës, atëherë unë e bëj atë. Kontribuoj aty ku ka nevojë vendi.
Erioni ka shkëlqyer në drejtimin e Bashkisë së Tiranës dhe fakti dhe popullariteti i tij tregon se e ka bërë punën shumë mirë. Ka mundësi që ta bëjë akoma më mirë në 4-vjeçarin tjetër. Ai ka tërë mbështetjen tonë, të çdo drejtuesi politik në PS të çdo anëtari të PS dhe përveçse këto janë saga mediatike që unë e kuptoj që duhen nga pak për të bërë më interesante jetën politike në vend dhe herë pas here më përmendet mua emri i Erionit, po unë po gjej rastin, nuk isha pyetur direkt për marrëdhënien me të, unë po gjej rastin të them: Ne jemi dy njerëz që kemi lidhje me njëri-tjetrin jashtë politike. Jemi njerëz që na bashkojnë familjet tona. Erioni është një person i cili është i rëndësishëm dhe për fëmijët e mi, pasi është nun i vajzës time. Takohemi edhe gjatë fundjavës për të ngrënë mëngjes me njëri-tjetrin.
Unë e kam parë që kohët e fundit njerëzit na shikojnë edhe me çudi pra duke dëgjuar gjëra që ndodhin në media që ndonjëherë unë nuk informohem dhe as ai nuk informohet dhe ajo që na ndodh është kur ulemi një të shtunë në mëngjes për të folur për punën dhe për të ngrënë mëngjes me njëri tjetrin, për të folur dhe për gjëra familjare, shikojmë njerëz që na shohin çuditshëm dhe pastaj kuptojmë që diçka ka dalë në media por që asgjë nuk është e vërtetë nga të gjitha këto. Jemi shokë të mirë dhe e gjithë kjo telenovela mediatike unë shpresoj që të shërbejë për të pasur lajme por që nuk ka asnjë bazë të vërtetë dhe asnjëherë as unë as ai nuk jemi ndikuar nga ato që thuhen në media,”– u shpreh Balluku.
