Kosova zyrtarisht ka hapur Ambasadën e saj në Jerusalem. Ministria e Jashtme e Kosovës njoftoi se ambasada u hap në përmbushje të zotimit të dhënë më 1 Shkurt kur të dyja vendet vendosën marrëdhëniet diplomatike, një hap që vulos edhe njohjen zyrtare të shtetit të Kosovës nga Izraeli.
Për kryeministrin në detyrë të Kosovës, Avdullah Hoti, kjo është një arritje e rëndësishme.
“Marrëveshja ka pas dilema prej shumicës së njerëzve dhe po shihet çdo ditë rëndësia e asaj marrëveshjeje. E kemi realizuar dhe po e realizojmë atë çdo ditë”.
E ngarkuara e deritanishme me punë e Kosovës në Izrael, Ines Demiri do të jetë ambasadore e Prishtinës zyrtare në Jeruzalem. Akti është kundërshtuar nga disa vende që e kanë njohur më herët pavarësinë e Kosovës, si Turqia, disa shtete të BE-së dhe ato me shumicë myslimane.
Hapja e ambasadës së Kosovës në Jeruzalem ishte parashikuar në Marrëveshjen e 4 Shtatorit të vitit të kaluar, që kryeministri Avdullah Hoti dhe presidenti serb Aleksandër Vuçiç nënshkruan në Shtëpinë e Bardhë në prani të ish-presidentit Donald Trump një marrëveshje për normalizimin e marrëdhënieve ekonomike.
Kjo marrëveshje parashikon që edhe Serbia të zhvendosë nga Tel Avivi në Jeruzalem ambasadën e saj, por Beogradi zyrtar ende nuk e ka ndërmarrë këtë hap.
