Fëmijët nën moshën 13 vjeç që përdorin telefona inteligjentë rrezikojnë seriozisht shëndetin e tyre mendor, sipas një studimi të ri global të publikuar në Journal of the Human Development and Capabilities. Sipas të dhënave të mbledhura nga organizata kërkimore Sapien Labs, përdorimi i hershëm i smartfonëve shoqërohet me rritje të ndjeshme të mendimeve vetëvrasëse, vetëvlerësim të ulët, agresivitet, vështirësi në rregullimin emocional dhe shkëputje nga realiteti.
Studimi tregon se vajzat preken më shumë sesa djemtë: 9.5% e vajzave që fillojnë të përdorin smartfonë në moshë të vogël shfaqin probleme serioze mendore, krahasuar me 7% të djemve. Përveç ndikimit në shëndetin mendor, fëmijët që kanë pasur akses të hershëm në telefon raportojnë gjithashtu për ndërprerje të gjumit, përvoja të ngacmimit kibernetik dhe marrëdhënie të tensionuara me familjen.
Efektet negative intensifikohen me kalimin e kohës. Të rinjtë në grupmoshën 18 deri në 20 vjeç që kanë përdorur telefona inteligjentë që në fëmijëri raportojnë nivelet më të ulëta të mirëqenies mendore, një prirje që studiuesit e lidhin edhe me përdorimin e shtuar të pajisjeve gjatë periudhës së pandemisë COVID-19.
Autorja kryesore e studimit, neuroshkencëtarja Tara Thiagarajan, i bën thirrje qeverive që të vendosin kufizime të qarta për përdorimin e smartfonëve nga fëmijët nën 13 vjeç, duke propozuar rregulla të ngjashme me ato për duhanin dhe alkoolin. Ajo thekson nevojën për ndërhyrje më të forta në platformat e mediave sociale dhe promovimin e edukimit për shkrim-leximin dixhital.
Disa vende evropiane tashmë kanë ndërmarrë hapa konkretë. Në disa shtete është ndaluar përdorimi i celularëve në ambientet shkollore, ndërsa Franca ka propozuar ndalim të aksesit në rrjetet sociale për fëmijët nën 15 vjeç. Po ashtu, Bashkimi Evropian po forcon kuadrin ligjor për të mbrojtur fëmijët nga keqpërdorimet në internet dhe përmbajtjet e rrezikshme.
Studimi i Sapien Labs vë në dukje urgjencën e adresimit të kësaj çështjeje si një problem shëndetësor dhe shoqëror me përmasa globale.
