Mungesa e reshjeve të shiut përgjatë muajve të parë të vitit duket se ka vënë në vështirësi të mëdha OSHEE-në.
Është vetëm muaji maj dhe OSHEE e ka tejkaluar që tani buxhetin e përcaktuar për blerjen e energjisë elektrike nga jashtë për këtë vit, duke shpenzuar më shumë se 115 milionë euro. Për këtë arsye, Enti Rregullator i Energjisë ka tejzgjatur dhe afatin e shlyerjes së kontratave të importit nga OSHEE nga 90 ditë në 180, me qëllim lehtësimin e barrës me të cilën po përballet kompania. Përveç kësaj, për të përballuar financiarisht situatën, janë marrë masa për reduktimin e investimeve të parashikuara nga OSHEE.
Megjithatë, ky nuk hyn ekzaktësisht tek faktet shqetësuese pasi duke qenë se përgjatë gjithë viteve që ka operuar OSHEE në Shqipëri, investimet kanë qenë minimale e thuajse inekzistente, nuk pritej që ky vit të përbënte ndryshim. Nga ana tjetër shqetësues është fakti se OSHEE vijon të bëjë shpenzime marramendëse që çojnë kompaninë thuajse buzë greminës e që kërkojnë më pas fonde nga buxheti rezervë i shtetit, për të përballuar situatën.
E gjithë kjo situatë, bie drejtpërdrejt ndesh me manovrat e Ministrisë së Energjisë dhe Infrastrukturës që po frenon investime të shumta në fushën e energjisë, siç ishte prishja e njëanshme e kontratave për 17 HEC-e. Pra në një situatë ku vendi është në vështirësi për sigurimin e energjisë elektrike dhe detyrohet ta blejë atë nga jashtë, Ministria vendos të ndërpresë në mënyrë tërësisht arbitrare investimet në sektorin hidrik që do të mund të lehtësonin krizën e energjisë. Në këtë mënyrë, OSHEE nuk do të duhej të importonte energji nga tregu i huaj, por do të mund të shfrytëzonte energjinë e prodhuar në vend, që do të favorizonte ndjeshëm ekonominë falë taksave të paguara nga koncesionarët, pagesave të tatimit mbi fitim dhe eksporteve për energjinë e pakonsumuar në vend.
Rrjedhimisht , këto manovra kontradiktore ngrenë dyshime të shumta mbi vendimet e Ministrisë së Energjisë dhe Infrastrukturës, që duket se në vend të favorizojë zhvillimin e sektorit dhe të ekonomisë, po favorizon aferat korruptive me tregtarët e energjisë.
