Ukraina do të paguajë 3,400 dollarë (100,000 Hr) në muaj për personelin ushtarak.
Rritja e konsiderueshme e pagave do të zbatohet për t’u treguar ushtarëve “se vendi është mirënjohës ndaj tyre”, citohet të ketë thënë presidenti Volodymyr Zelensky.
Ndryshe, siç vë në pah mediumi “The kyivindependent”, paga minimale në ushtri dikur ishte 340 dollarë (10,000 Hr).
Një hap i këtij vendi vjen pasi presidenti rus Vladimir Putin të enjten urdhëroi operacionet ushtarake në këtë shtet evropian.
Disa ditë para, Putin nënshkroi dekretin ku njeh shtete dy rajonet separatiste, ndërsa disa orë pas këtij veprimi që u dënua ashpër nga Perëndimi, u dha urdhri edhe për operacionet ushtarake në Ukrainë.
Në anën tjetër, autoritetet e sigurisë në Ukrainë kanë bërë thirrje për mobilizim.
Deri më tani dhjetëra civilë kanë humbur jetën, kurse autoritetet ukrainase kanë njoftuar se edhe trupat ruse kanë pësuar humbje të mëdha si në njerëz ashtu dhe në makineri.
Nga ana tjetër kujtojmë se sipas ekspertëve gjermanë të sigurisë, pushtimi i Rusisë jo vetëm që kërcënon sovranitetin e Ukrainës, por ka minuar të gjithë rendin gjeopolitik.
Vendimi i presidentit Vladimir Putin për të dërguar trupa përtej kufirit të një kombi sovran – pushtimi më i madh i këtij lloji që nga Lufta e Dytë Botërore – ka krijuar atë që shumë e shohin si një precedent të tmerrshëm.
