Gjermania ka vendosur të forcojë kufizimet për të pavaksinuarit kundër COVID-19. Njerëzit e pavaksinuar nuk do të jenë në gjendje të hyjnë në dyqane, restorante, vende kulture ose argëtimi jo thelbësore, njoftoi të enjten kancelarja në largim Angela Merkel.
Hapat e rinj u ndërmorën pas një takimi midis Merkelit, pasardhësit të saj Olaf Scholz dhe liderëve të 16 rajoneve të vendit.
Ata konfirmuan gjithashtu se një projektligj për vaksinimin e detyrueshëm, të cilin Scholz e mbështet, do t’i paraqitet parlamentit për hyrje në fuqi në shkurt ose mars.
“Situata nw vendin tonw wshtw serioze”, u tha Merkel gazetarëve në Berlin, duke e quajtur masën një “akt të solidaritetit kombëtar”.
Ajo tha se zyrtarët gjithashtu ranë dakord të kërkojnë maska në shkolla, të vendosin kufizime të reja në takimet private dhe të synojnë 30 milionë vaksinime deri në fund të vitit.
Merkel tha gjithashtu se parlamenti do të debatojë mundësinë e vendosjes së një mandati të përgjithshëm të vaksinës që do të hyjë në fuqi që në shkurt.
Rreth 68.7% e popullsisë në Gjermani është plotësisht e vaksinuar, shumë më poshtë minimumit prej 75% që synon qeveria.
Ministri i Financave Olaf Scholz, i cili pritet të zgjidhet kancelar nga një koalicion i qendrës së majtë javën e ardhshme, tha të martën se ai mbështet një mandat të përgjithshëm të vaksinës, por favorizon që ligjvënësit të votojnë sipas ndërgjegjes së tyre personale dhe jo sipas linjave partiake për këtë çështje.
Rritja e rasteve me COVID-19 gjatë disa javëve të fundit dhe ardhja e variantit të ri omicron kanë nxitur paralajmërime nga shkencëtarët dhe mjekët se shërbimet mjekësore në vend mund të stërzgjaten në javët e ardhshme nëse nuk ndërmerren veprime drastike. Disa spitale në jug dhe lindje të vendit kanë transferuar tashmë pacientë në pjesë të tjera të Gjermanisë për shkak të mungesës së shtretërve të kujdesit intensiv.
Marrëveshja për masat që duhen marrë është komplikuar nga struktura politike e Gjermanisë – me 16 shtetet përgjegjëse për shumë prej rregulloreve – dhe tranzicioni i vazhdueshëm në nivel federal.
Agjencia gjermane e kontrollit të sëmundjes raportoi të enjten 73,209 raste të reja të konfirmuara. Instituti Robert Koch raportoi gjithashtu 388 vdekje të reja nga COVID-19, duke e çuar totalin që nga fillimi i pandemisë në 102,178.
