Mëngjesin e sotëm një aksident i tmerrshëm ka ndodhur në Bullgari, ku një autobus u përplas dhe mori flakë.
Kryeministri maqedonas, Zoran Zaev deklaroi se ka arritur të bisedojë me njërin nga personat e plagosur që ndodhen në spitalin “Pirogov”.
Në një intervistë për Bulgaria ON AIR, Zaev pohoi se viktimat janë të moshave të reja, 25-30 vjeç, por mes tyre ka edhe fëmijë.
I mbijetuari nga aksidenti i tmerrshëm i kishte rrëfyer Zaev se ata që kanë arritur të shpëtojnë kanë thyer dritaret dhe kanë dalur nga autobusi. Personi që ka shpëtuar ka treguar se fillimisht pasagjerët janë tronditur kur kanë dëgjuar një shpërthim.
Gjithashtu Zaev iu drejtohet autoriteteve bullgare duke iu ofruar ndihmë në hetimin e ngjarjes, nëse atyre iu nevojitet.
“Ai më tha se ka dëgjuar shpërthim. Kanë arritur të shpëtojnë pasi kanë thyer dritaret dhe kanë arritur të dalin nga autobusi. Viktimat e tragjedisë janë persona të moshës prej 25-30 vjeç, ka edhe fëmijë. Tragjedia është e madhe. Ju besojmë kolegëve tanë bullgarë për hetimin. Nëse u duhet ndihmë, jemi të gatshëm të ndihmojmë në hetim. Tani më e rëndësishmja është të shohim t’u ndihmojmë të lënduarve”, deklaroi Zaev.
Ngjarja e rëndë ndodhi rreth orës 02:00 sipas orës lokale, në një autostradë pranë fshatit Bosnek në perëndim të Bullgarisë. Aktualisht vazhdojnë hetimet për zbulimin e shkaqeve të aksidentit dhe shpërthimit në flakë të autobusit. Mësohet se 7 persona janë dërguar në spital.
