Kontrolli i Lartë i Shtetit (KLSH) e ka cilësuar të pa bazë vendimin për të prishur 11 objektet e tërmetit.
Procesi i rindërtimit, i cili ka nisur pas tërmetit të 26 nëntori 2019, është shoqëruar me kritika dhe probleme. Së fundmi, probleme të mëdha kanë lindur tek lagja 5 Maj, ku një pjesë e banorëve bllokuan hyrjen e punonjësve të IKMT-së.
Procesi i rindërtimit u shtri në disa bashki të vendit. KLSH ka bërë një auditim mbi këtë proces, duke e analizuar atë.
Në analizë, KLSH ka hasur mangësi në dokumentacione, konkretisht në Durrës. KLSH ka gjetur problematika nga institucionet vlerësuese.
Auditimi i KLSH me temë “Mbi zbatimin e procedurave ligjore në lidhje me Vendimin nr. 32, datë 02.07.2020 të Komisionit Shtetëror të Rindërtimit, për objektet e Bashkisë Durrës”, nxjerr në pah se ka pasur kalim të kompetencave nga institucionet. Pra të njëjtat institucione që kanë bërë vlerësimin fillestar, kanë bërë dhe oponencën teknike.
KLSH bën me dije përmes një njoftimi për shtyp se, vendi ku është ndërtuar objekti ka rëndësi arkeologjike dhe thekson se nuk ka pasur një vlerësim paraprak për këtë përpara se të bëhej ndërtimi në atë zonë.
Më tej raporti i KLSH, vlerëson se kërkesa e Bashkisë Durrës për hartimin e një akt ekspertize është i pabazuar në një rivlerësim të thelluar.
Për më tepër, vetë Instituti i Ndërtimit i cili ka hartuar dhe miratuar këto akte, njëkohësisht ka bërë dhe oponencën e tyre, vlerëson KLSH.
Kjo gjë sipas raportit është në kundërshtim me VKM-në nr. 26, date 15.01.2020, “Për kryerjen e akt-ekspertizës së thelluar në ndërtesat e dëmtuara”.
KLSH gjykon se procedurat e ndjekura mbartin riskun që aktet e ekspertizës (së thelluar) të mos shprehin saktë dhe drejtë situatën.
Në njoftimin e KLSH, thuhet se vlerësimet për riparimet që janë bërë nga institucionet nuk kanë dhënë detaje për masat apo ndërhyrjet që duhet të bëhen dhe as vlerat financiare duke mbartur kështu risk.
Si përfundim, KLSH vlerëson se ajo që e bën të pabazë rindërtimin e këtyre objekteve është mungesa e vlerës financiare.
“Nën gjykimin e pavarur të grupit të auditimit, vlerësojmë se, në kushtet kur procedurat e ndjekura për vlerësimin e 11 objekteve të Bashkisë Durrës, që kanë pësuar dëme gjatë tërmetit, janë kryer në kundërshtim me kuadrin ligjor dhe rregullator në fuqi, dhe si pasojë edhe dokumentet – produkt i këtyre procedurave (akt ekspertizat, oponencat) nuk janë në përputhje me kriteret ligjore, procesi i vendimmarrjes veçanërisht për prishjen e detyruar të objekteve, është i pabazë dhe mbart riskun që njëkohësisht të jetë edhe e gabuar”, përmbyll raporti i KLSH.
