Situata e zjarreve në disa rajone të Kosovës ka ardhur duke u përkeqësuar, ndërsa zona e Suharekës prej tre ditësh është ndër më të goditurat. Kryetari i Komunës së Suharekës, Bali Muharremaj, ka bërë me dije se në fshatin Krushicë kanë dalë mbi 100 vullnetarë për të shpëtuar shtëpitë nga zjarret.
Ai ka thënë në një intervistë për RTV Dukagjini se aktualisht janë tetë vatra zjarri aktive, ndërsa ka bërë me dije se është djegur edhe një shtëpi në fshatin Vraniq. Muharremaj ka shtuar se situate ka qenë e pamenaxhueshme për shkak edhe të mungesës së zjarrfikësve.
“Malin në këtë pjesë nuk mund të shpëtojmë. Por përpiqemi t’i shpëtojmë shtëpitë. Kemi tetë vatra të zjarreve. Diku më shumë e diku më pak. Mirëpo për fat të keq kemi edhe ndezjen shtëpisë së parë në fshatin Vraniq. Situata ishte e pamenaxhueshme me qytetarët dhe zjarrfikësit pasi kemi shumë pak zjarrfikës”, ka thënë ai.
Muharremaj është shprehur më tej se zjarri është afruar shumë me shtepitë në fshatin Studeniqan, por situate është menaxhuar disi së bashku me banorët. Ai ka deklaruar se në komunën e Suharekës janë vetëm 12 zjarrfikës. Ndër të tjera ai bëri me dije se sonte pritet edhe ndërhyrja me helicopter nga KFOR-i, pasi me mjete të tjera rrethanore është e vështirë të ndërhyhet.
