Ekspertët në Shtetet e Bashkuara të Amerikës kanë këshilluar mbajtjen e maskës në ambientet e mbyllura edhe për personat që janë vaksinuar plotësisht ndaj Covid-19, në një kohë që vendi po përballet me një rritje të rasteve pozitive.
Duke cituar informacione të reja në lidhje me aftësinë e variantit Delta për t’u përhapur midis njerëzve të vaksinuar, Qendra për Kontrollin dhe Parandalimin e Sëmundjeve (CDC) të martën, rekomanduan gjithashtu maska në ambiente të mbyllura për të gjithë mësuesit, stafin, studentët dhe vizitorët në shkolla, pavarësisht nga statusi i vaksinimit.
“Në zonat me transmetim të konsiderueshëm dhe të lartë, CDC rekomandon që njerëzit plotësisht të vaksinuar të mbajnë maska në ambiente të brendshme, për të ndihmuar në parandalimin e përhapjes së variantit Delta dhe për të ndihmuar në mbrojtjen e të tjerëve”, tha drejtuesja e CDC, Rochelle Ëalensky gjatë një konferencë për shtyp pasdite.
Në SHBA regjistrohen mesatarisht më shumë se 57,000 raste koronavirus në ditë dhe 24,000 shtrime në spital dhe zyrtarët e shëndetit publik për javë të tëra kanë paralajmëruar që infeksionet COVID-19 po rriten, veçanërisht në pjesë të vendit me norma të ulëta vaksinimi.
Rritja e fundit e rasteve vjen pasi mbajtja e maskave dhe kufizime të tjera të shëndetit publik u hoqën dhe restorantet, baret dhe vendet e tjera u rihapën në shumë pjesë të vendit mes një rritje të ndjeshme të niveleve të vaksinimit kombëtar.
