Ministri i Shëndetësisë në Kroaci, Vili Baros, ka dhënë detaje për gjendjen shëndetësore të 45 personave që mbetën të plagosur pas aksidentit tragjik që ndodhi ditën e sotme në Kroaci, ku mbetën 10 të vdekur. Baros në një deklratë për mediat u shpreh se në total janë aksidentuar 69 persona, 67 pasagjerë dhe dy shoferë.
Nga ta kanë vdekur 10 persona, 42 të plagosur janë dërguar në spital në Slavonsko Brod, kurse tre të tjerë janë hospitalizuar në Nova Gradisht. Gjithashtu ministri ka shtuar se 15 prej të plagosurve janë në gjendje të rëndë, tre prej të cilëve ndodhen në sallën e operacionit. Mes 45 të plagosurve, 15 janë të mitur, një prej të cilëve ndodhet në gjendje të rëndë.
“Sipas të dhënave te momentit të cilat edhe mund të ndryshojnë, janë aksidentuar 69 persona, 67 pasagjerë dhe dy shoferë, nga ta fatkeqësisht kanë vdekur 10 persona,42 të lënduar janë dërguar në spital në Slavonsko Brod kurse dy janë hospitalizuar në Nova Gradisht. Në Nova Gradisht është një i lënduar i cili ka lëndime të kurrizit, për çka e kemi aranzhuar dërgimin në klinikën e traumatologjisë në Zagreb.
“Kemi edhe të lënduar rëndë, që janë 15, tre janë në operacion, kurse të tjerët janë duke u diagnostikuar, është e mundur qe edhe ndonjë që është duke u trajtuar të marr diagnozën e të lënduarit rëndë, kështu qe gjithçka është e mundur. Ajo që po e theksoj që në fatkeqësi kanë qenë edhe 15 të mitur, nga të cilët një vajzë ka lëndime të rënda, kurse të tjerët janë pranuar këtu,”- tregoi Baros.
Kujtojmë se nga aksidenti i rëndë mbetën të vdekur 10 persona, ndërsa 45 të tjerë janë plagosur. Autobusi me targa Kosove ishte nisur nga Frankfurti i Gjermanisë për në Kosovë, mirëpo përgjumja e drejtuesit bëri që mjeti të dilte nga rruga dhe të rrëshqiste për më shumë se 100 metra. Gjithashtu është arrestuar edhe shoferi.
