Një ngjarje e rëndë ka tronditur mbrëmjen e kaluar zonën e Lecce-s në Itali. Sipas mediave vendase nëj 69-vjeçar është vrarë nga dy shqiptarë, të cilët pasi e kanë pritur të moshuarin të tërhiqte paratë nga ATM-ja , ia kanë marrë paratë dhe më pas e kanë vrarë.
Viktima është Giovanni Caramuscio i cili mësohet se ka qenë një ish menaxher banke i dalë në pension. Kamerat e ATM-së kanë filmuar dy shqiptarët të cilët në momentin që kanë kryer vrasjen kishin vënë maska anti-COVID, por gjatë arratisjes ata kishin lënë më shumë sesa një gjurmë në vendngjarje.
Mësohet se në momentin që është vrarë 69-vjeçari ka qenë i shoqëruar nga gruaja e tij e cila pa të gjithë skenën e tmerrshme dhe identiteti i shqiptarëve është bërë i ditur pas dëshmisë së saj para hetuesve.
Ndërkohë që policia po kontrollon të gjithë zonën për të gjetur armën që shqiptarët kryen krimin, e cila mund të sjellë prova të reja në lidhje me ngjarjen. Këtë mëngjes zhytësit e ekipit të zjarrfikësve u futën brenda një pusi në një distancë të shkurtër nga banka. Sidoqoftë, kërkimet për armën e vrasjes nuk dhanë asnjë rezultat. Karabinierët që hetojnë incidentin tashmë kanë në duart e tyre videon e kamerës së sigurisë të degës së Banco di Napoli në San Pietro në Lama.
