Këshilli i Sigurimit i OKB të premten miratoi njëzëri një zgjatje të veprimtarisë në pikën e vetme kufitare përmes së cilës ndihma humanitare arrin një pjesë të Sirisë të kontrolluar nga rebelët. Kjo erdhi nga një kompromis i arritur nga Shtetet e Bashkuara dhe Rusia. Të dyja shtetet përshëndetën atë që ata e quajtën një rast të rrallë të bashkëpunimit midis tyre.
Autorizimi i ndihmës ndërkufitare i OKB për Sirinë veriperëndimore, që pritet të skadonte të shtunën, tani do të zgjatet me gjashtë muaj, me një rinovim tjetër të mundshëm. Organizatat humanitare janë lutur për muaj me radhë për një zgjatje të autorizimit të OKB për kalimin në Bab al-Hawa. Teksti i miratuar është një bashkim i dy drafteve – një i propozuar nga Norvegjia dhe Irlanda dhe një tjetër nga Rusia.
Shtetet e Bashkuara kishin bërë presion që pika e kalimit kufitar nga Turqia të rinovohet për një vit të plotë dhe e sheh këtë rezolutë duke bërë pikërisht këtë gjë. Por Rusia e quan atë vetëm një zgjatje gjashtë mujore, me një shtesë të mundshme gjashtë muaj në varësi të një raporti nga sekretari i përgjithshëm i OKB në fund të vitit.
Teksti është rezultat i një kompromisi midis Shteteve të Bashkuara dhe Rusisë në bisedimet e minutës së fundit që u zgjeruan për të sjellë tre anëtarët e tjerë të përhershëm të këshillit – Britania, Kina dhe Franca.
Rreth tre milion njerëz jetojnë në Sirinë veriperëndimore të mbizotëruar nga xhihadistët, më shumë se gjysma e zhvendosur nga konflikti që zgjat më shumë se një dekadë.
