Presidentja e Kosovës, Vjosa Osmani ka thënë se nëse Serbia mendon të kalojë kufirin me ushtrinë e saj, atëherë ata do të përballen me ushtarë nga Shtetet e Bashkuara dhe anëtarë të tjerë të NATO-s. në një intervistë për mediat kroate, Osmani tha se Kosova nuk është vetëm dhe Serbia e di mirë këtë.
Ajo u shpreh se ushtria serbe e sheh Rusinë si aleate dhe kjo gjë është e qartë dhe u tregua edhe në stërvitjen që ata bënë paralelisht kur vendet e tjera të rajonit po mbanin stërvitjen “Defender 21”.
“Është e qartë se ushtria serbe e sheh Rusinë si aleatin e saj kryesor për sa i përket bashkëpunimit ushtarak, por edhe të politikës së asaj ekonomie. Ata e tregojnë atë hapur. Ndërsa vendet në rajon, të tilla si ne ose Kroacia, zhvilluan stërvitjen ‘Defender Europe 21’ së bashku me NATO-n dhe Shtetet e Bashkuara, Serbia organizoi stërvitje ushtarake me Rusinë në të njëjtën kohë. Ishte i vetmi vend në rajon që nuk ishte i pranishëm në stërvitjen ‘Defender Europe 21’ të udhëhequr nga SHBA-ja. Kohët e fundit mund të shohim se si ata organizojnë stërvitje ushtarake me Rusinë dhe Bjellorusinë, gjë që tregon orientimin e tyre. Nuk jam e sigurt se çfarë kanë në mendje kur bëhet fjalë për retorikën që ata përdorin, por di një gjë shumë mirë: nëse kalojnë kufirin me Kosovën ata do të takohen me ushtarë nga Shtetet e Bashkuara dhe anëtarët e tjerë të NATO-s. Ne nuk jemi vetëm dhe Serbia e di mirë këtë! Ata u përpoqën ta bënin atë një herë në 1999. Nuk mendoj se ata do të dëshirojnë të provojnë përsëri”, tha Osmani për express.hr.
