Kryeministri i Luksemburgut Xavier Bettel, i cili prej më shumë se një jave ka qenë i infektuar me Covid-19, është shtruar në spital për disa analiza shtesë dhe vëzhgim mjekësor. Lajmin në fjalë e ka bërë të ditur qeveria e Luksemburgut.
“Kryeministri shkoi në spital sot për kontrolle dhe analiza të mëtejshme”, tha qeveria në një deklaratë të dielën. “Shtrimi është bërë si një masë paraprake dhe nëse nuk ka një kundërindikacion mjekësor, Kryeministri do të qëndrojë atje nën vëzhgim për një periudhë prej 24 orësh.”
Detaje të tjera në lidhje me gjendjen e Bettel nuk u njoftuan menjëherë.
Bettel, i cili është 48 vjeç, doli pozitiv për COVID-19 më 27 qershor pasi u kthye nga një samit i Bashkimit Evropian në Belgjikë. Ai po vuante nga ethe dhe dhimbje koke në atë kohë dhe ai vazhdoi punën e tij nga shtëpia,e cila përfshinte një takim dixhital me CEO të Google Sundar Pichai të enjten.
Bettel, i cili është një nga udhëheqësit e parë homoseksual në botë, ka shërbyer si kryeministër i Luksemburgut që nga dhjetori i vitit 2013. Ai mori dozën e parë të vaksinës së AstraZeneca më 6 maj dhe ishte ende në pritje të dozës së tij të dytë kur doli pozitiv.
