Bashkimi Europian ditën e sotme ka vendosur që në listën e vendeve që do të udhëtojnë pa kufizime, të shtohen Kanadaja dhe 10 vende të tjera, në listën e tyre të destinacioneve që do të lejojnë udhëtime të panevojshme.
Sipas burimeve diplomatike, ambasadorët e 27 vendeve anëtare të Bashkimit Europian, miratuan shtesat gjatë takimit të sotëm dhe ndryshimet do të hyjnë në fuqi brenda pak ditësh. Mbretëria e Bashkuar, një ish-anëtare e Bashkimit Evropian, ku varianti “Delta” ka shkaktuar një rritje të numrit të rasteve Covid-19, nuk është në listë.
Mediat e huaja bëjnë me dije se vendet e shtuara së fundmi në listën e atyre që do të udhëtojnë pa asnjë kufizim, janë: Armenia, Azerbajxhani, Bosnje dhe Herzegovina, Brunei, Kanada, Jordania, Kosova, Moldavia, Mali i Zi, Katar dhe Arabia Saudite.
Bashkimi Europian gjithashtu rekomandon që vendet e BE-së, gradualisht të heqin kufizimet e udhëtimit për 14 vendet në listë: Shqipëria, Australia, Izraeli, Japonia, Libani, Zelanda e Re, Maqedonia Veriore, Ruanda, Serbia, Singapori, Koreja e Jugut, Tajvani, Tailanda dhe Shtetet e Bashkuara. Përfshihen edhe rrethet administrative kineze të Hong Kongut dhe Makaos.
Me sezonin turistik që po shkon drejt pikut dhe temperaturat që po kapin maksimumin, njerëzit kanë filluar të shohin udhëtimin drejt plazheve si zgjidhjen e vetme për të kaluar këtë moment të vështirë.
