Presidenti i Sllovenisë, Borut Pahor në një konferencë të përbashkët me Presidenten e Kosovës, Vjosa Osmani ka thënë se do t’u kërkojë shteteve anëtare të BE-së që të vazhdojnë zgjerimin e Bashkimit Evropian në Ballkanin Perëndimor në mënyrë që të evitohet ideja për ndryshim kufijsh.
Gjithashtu Presidenti i Sllovenisë ka thënë se zgjerimi i BE-së, është i domosdoshmëri.
“Konstatoj se ndërmjet udhëheqësve në Ballkanin Perëndimor deri te zvogëlimi i perspektivës evropiane kjo lidhet me ngadalësimin e anëtarësimit të shteteve të Ballkanit Perëndimor. Zgjerimi i BE-së është domosdoshmëri, dhe se BE-ja e sheh këtë hapësirë si tërësi. Kjo do ta përforconte besimin e njerëzve në perspektivën evropiane, do të nxiste vullnetin politik për reforma dhe do ta evitonte rrezikun për të menduar ndryshime të kufijve mes shteteve”, tha Pahor.
Ai tha se testi i parë për BE-në rreth integrimit evropian të Ballkanit do të jetë të hënën.
“Në pjesën e dytë Sllovenia do ta udhëheqë presidencën e BE-së, do të dëshiroja që të paraqiteshin disa lëvizje pozitive në këtë drejtim. Testi i parë do të jetë takimi i së hënës në Brdo-Brijun. Para fillimit të samitit do t’i bëjmë edhe bisedat e fundit dhe takimi të jetë një porosi për BE-në dhe shtetet e Ballkanit”, tha Pahor.
Ndërkaq, presidentja Vjosa Osmani falenderoi Slloveninë për përkrahjen e Kosovës duke cekur se Kosova ka përmbushur kriteret dhe se BE-ja duhet t’i heqë vizat për Kosovën.
“Kjo është vizitë pune e presidentit për përgatitjen e procesit të Brdo-Brijunit më 17 maj ku unë do ta përfaqësoj Republikën e Kosovës dhe për këtë e falenderoj presidentin për ftesën. Folëm për nevojën e përshpejtimit të integrimit evropian të gjithë rajonit, e sigurova se Kosova e ka prioritet mbi prioritete integrimin në BE. Reformat që duhet të ndërmerren për këtë proces janë reforma qe u duhen qytetarëve sepse kanë të bëjnë me arsim më të mirë, sundim të ligjit më të mirë Kosova ka plotësuar kriteret për liberalizim të vizave dhe tani i takon BE-së që ta mbajë premtimin. Qytetarët për fat të keq po mbahen të mbyllur për dallim prej të tjerëve që kanë përfituar nga ky proces. Liberalizimi i vizave për Kosovën në këtë fazë do ta ngriste kredibilitetin e Bashkimit Evropian”, tha ajo.
