Marsi i këtij viti në Republikën Çeke ishte më vdekjeprurësi se çdo muaj tjetër qysh në vitin 1947, bëri të ditur Agjencia e Statistikave e këtij vendi.
Sipas të dhënave të saj, 16,000 vdekje u regjistruan në mars – rreth 60 për qind më shumë se numrat mesatarë për atë muaj në periudhën 2015-2019. Rajoni Usti u godit më së keqi.
Republika Çeke u përball me valë të rëndë të koronavirusit në muajin mars, çfarë e detyroi Qeverinë që t’i ndalojë udhëtimet midis rajoneve për disa javë.
Nga viktimat e raportuara për atë muaj, 5,779 ishin njerëz që u infektuan me koronavirus dhe vdiqën, kanë treguar më herët të dhënat e Ministrisë së Shëndetësisë.
Sipas Agjencisë së Statistikave, vdekshmëria ishte më e lartë midis burrave sesa grave. Javëve të fundit, situata pandemike është përmirësuar dukshëm në Republikën Çeke. Mesatarja shtatëditore e infektimeve ka rënë në 95 raste për 100,000 banorë. Të hënën, Çekia ka nisur rihapjen e dyqaneve jothelbësore, pas gati gjashtë muajsh të mbyllura.
Gjendja e jashtëzakonshme gjashtë mujore në Çeki ka mbaruar me 12 prill, ku vendi i jep fund rregullave të ashpra të pandemisë raportojnë mediat çeke.
Ora e ndalimit nuk do të jetë më por sigurisht që mbeten kufizime të lehta sepse ekziston akoma frika se mund të përsëritet e njëjta situatë pasi Çekia ka qenë ndër vendet më të goditura në botë nga Covid-19 sipas mediave të huaja.
Megjithatë edhe pse masat janë lehtësuar njerëzve u kërkohet ta mbajnë akoma maskën në publik.
Vendi me 10.7 milion ka raportuar 1.58 milion raste COVID-19 që nga fillimi i pandemisë në Mars 2020 dhe vdekjet janë afër 28 mijë, niveli më i lartë në botë, sipas të dhënave.
Marrë nga REL
