Mjekët për aktivistin e burgosur rus të opozitës Alexei Navalny thonë se ai “do të vdesë brenda ditëve të ardhshme” nëse nuk i jepet kujdes shëndetësor.
Mjekët thonë se rezultatet e fundit të testit të gjakut tregojnë se ai mund të pësojë arrest kardiak ose dështim të veshkave në çdo moment. Navalny ka qenë në një grevë urie për 19 ditë, për të kërkuar trajtimin e duhur për dhimbjet akute të shpinës dhe mpirjen e këmbëve.
Ambasadori rus në Mbretërinë e Bashkuar ka thënë se Navalny nuk do të lejohet të vdesë në burg, shkruan BBC.
Katër mjekë, përfshirë mjekun e tij personal, Anastasia Vasilyeva, u kanë shkruar zyrtarëve të burgut për të kërkuar leje për ta parë atë urgjentisht. Në letrën, të cilën Dr. Vasilyeva postoi në Twitter, ekspertët thanë se kaliumi i Alexei Navalny kishte arritur “nivele kritike”.
“Kjo do të thotë se veshkat nuk po funksionojnë si duhet dhe se probleme serioze të ritmit të zemrës mund të ndodhin çdo minutë,” shpjegoi ajo.
Pasja e niveleve të kaliumit në gjak më të larta se 6.0 mmol (milimole) për litër zakonisht kërkon trajtim të menjëhershëm. Rezultatet e testit të gjakut të Navalny, të cilat u morën nga avokatët e tij, treguan se ai ishte në nivelin 7.1. Mjekët kanë nxitur zyrtarët e burgut t’i lënë ata të ekzaminojnë Navalny menjëherë, “duke marrë parasysh testet e gjakut dhe helmimin e tij të fundit”.
