Sot, më 8 maj, shënohet Dita Botërore e Kryqit të Kuq dhe Gjysmëhënës së Kuqe, një datë që nderon kontributin e jashtëzakonshëm të vullnetarëve dhe punonjësve humanitarë në mbarë botën.
Kjo ditë është zgjedhur për të përkujtuar lindjen e themeluesit të Kryqit të Kuq, Henry Dunant, i cili është edhe laureati i parë i Çmimit Nobel për Paqe.
Fillimisht u shënua në vitin 1948 si Dita e Kryqit të Kuq dhe, pas disa ndryshimeve zyrtare, në vitin 1984 mori emrin aktual që përfshin edhe Gjysmëhënën e Kuqe.
Këtë vit, motoja që shoqëron ditën është: “Ta mbajmë gjallë humanitetin”, një thirrje për të njohur dhe vlerësuar përkushtimin e atyre që, shpesh në kushte të vështira e të rrezikshme, ofrojnë ndihmë, mbështetje dhe shpresë për njerëzit në nevojë.
Në mesazhin për këtë 8 maj, organizata thekson:
“Çdo ditë, në komunitete anembanë botës, vullnetarët dhe stafi i Kryqit të Kuq dhe Gjysmëhënës së Kuqe zgjedhin të qëndrojnë në anën e njerëzimit.
Ne nderojmë përkushtimin e tyre të palëkundur, ndaj komuniteteve të cilave u shërbejnë, parimeve që ata mbështesin dhe njerëzve që ata ndihmojnë dhe mbrojnë.”
Kjo ditë është një reflektim mbi fuqinë e solidaritetit dhe humanizmit në kohë krizash.
