Ish-ministri i Bujqësisë Edmond Panariti me anë të një statusi në Facebook i ka kërkuar ministrit aktual, Bledi Çuçi, që të aktivizojë fondin prej 72 milionë eurosh të ardhur nga BE për bujqësinë në vend, e cila gjithashtu ka pësuar krizë nga koronavirusi.
Më tej, Panariti shkruan se fondet duhet të shkojnë si mbështetje direkte për fermerët në vështirësi, të cilët sipas tij janë në prag falimentimi.
Sipas tij, qeveria duhet të ndërhyjë menjëherë, pasi situata është serioze dhe se vetë politika për bujqësinë e BE, po shikon mundësinë për kryerjen e pagesave direkte për fermerët e tyre më herët se vitet e tjera, duke rritur sasinë e parave paradhënie.
Kujtojmë se në planin e saj financiar qeveria ka lënë jashtë bujqësinë, ashtu si edhe median e turizmin.
Sakaq, ditën e sotme PD ka vijuar akuzat e saj kundër qeverisë se nuk po kryen testim masiv si vendet e tjera.
STATUSI I PLOTE
72 milionë euro të papërdorura nga paratë e BE për bujqësinë, (fondet IPARD), të cilat “flenë” ende në sirtar të shkojnë si mbështetje direkte për fermerët në vështirësi!
Sa më parë dhe sa më shpejt!
Jo si asistencë mbijetese por për prodhim në kushte krize! Ato para, në kushtet e paralizës së tregjeve dhe pamundësisë së ekzekutimit të projekteve për shkak të pandemisë, do të “digjen” brenda vitit, nëse nuk i kërkohet që tani Bashkimit Evropian që ato të përdoren për të mbështetur fermerët e pambrojtur dhe të pambështur ne prag falimenti nga kriza e rëndë e COVID.
Kjo është “lëvizja” që do të mirëpritej nga BE pas propozimit të qeverisë!
Sepse ky “rikanalizim” i fondeve në përshtatje me situatën, u shqyrtua edhe në mbledhjen e 26 Marsit të Ministrave të Bujqësisë të BE, të cilët konstatuan se vetë rregullorja krijon fleksibilitet të mjaftueshëm për një veprim të tillë.
Prandaj Komisioni, ka vënë ne levizje një proces të përshpejtuar për administratat kombëtare për ta përshtatur programin me krizën aktuale.
Vetë politika për bujqësinë e BE, po shikon mundësinë për kryerjen e pagesave direkte për fermerët e tyre më herët se vitet e tjera, duke rritur sasinë e parave paradhënie.
Prandaj duhet vepruar shpejt, menjëherë.. Tani!
