Qeveria shqiptare vazhdon të bëjë veprime që krijojnë polemika, madje vazhdimisht, duke mos u shqetësuar fare nga opinioni publik apo mendimi i qytetarëve të thjeshtë të Shqipërisë. E duket sikur këto veprime të qeverisë, bëhen edhe pa u bezdisur fare, sikur mendimet e qytetarëve nuk kanë aspak vlerë. Të ishte vetëm mendimi i qytetarëve, mirë, por kur iu cenohet dhe e drejta, këtu nis problematika e madhe.
Sezoni turistik po afron pak e nga pak dhe të gjithë po shohin plazhin si mundësinë e vetme për t’i shpëtuar vapës së madhe. Çdo qytetar, e bën plazhin me “terezinë” financiare që ka, dikush në jug, aty ku është më shtrenjtë, e dikush në Durrës ose në veri, ku kushton më pak. Por dhe zgjedhja e qytetarëve sipas mundësive të tyre, po cenohet nga qeveria.
Pse? Sepse prej 7 vitesh, qeveria vë në lëvizje tatimet për të mbyllur dhe gjobitur biznese të ndryshme, si dhe për të shembur godinat që janë ndërtuar pa leje. Në rregull, të ndalosh objektet e parregullta është diçka pozitive nga ana e qeverisë, por arsyeja pse e bën këtë gjë, dhe periudha në të cilën e bën, ngre dyshime të forta.
Si ka mundësi që qeveria shqiptare lëviz pikërisht pak javë para dyndjes së shqiptarëve drejt plazhit? Mësohet se kjo “strategji” e kryeministrit, bëhet pikërisht për të sulmuar bizneset e tjera dhe për t’i dërguar njerëzit e thjeshtë drejt bizneseve që menaxhohen nga miqtë e tij.
Prej 7 vitesh ndodh e njëjta situatë dhe edhe këtë vit, do të ndodhë e njëjta gjë. Bizneset e mëdha në jugun e Shqipërisë, gjithmonë kanë pasur prioritet dhe mbështetje nga qeveritë dhe pikërisht ata, pasurohen e pasurohen pas çdo sezoni turistik. Pra, qytetarë të dashur, nëse shkoni në plazh dhe shikoni biznese që po mbyllen apo që po iu shemben nga qeveria, dijeni se ata e kanë ngritur atë biznes pa qenë partner me këtë qeveri aktuale…
